Ehmed Mistefa diyar kir ku armanca dagîrkeriya tirkî qirkirina gelan e û got, Tirkiye ji bo dagîrkirina herêmê, tevayiya rêbazên bêxalaq bi kar tîne. Bi taybetî li dijî ciwanan şerekî pir qirêj dike û divê ciwan şiyar bin.
Şehba/Zana Roj
Di demên dawî de dewleta tirkî ya dagîrker êrişên xwe yên bi balafirên bêmirov yên ser herêmên bakur û rojhilatê Sûriyê zêde kirine. Dagîrkerî, pêşengên şoreşa Rojava, fermandarên ku operasyonên li dijî çeteyên DAIŞ’ê dimeşînin û welatiyên herêmê dike amanca êrişên xwe. Bi taybetî bi pêngava Sondê ya QSD’ê dest pê kirî, derket holê ku tevayiya êrişên dagîrkeriya tirkî, bi alîkariya sîxur û xayînên li herêmê tên kirin. Herwiha piştî ku pêngavê dest pê kir QSD’ê ragihand ku bi 10’an sîxurên MÎT’ê hatine girtin û ev sîxur li xwe mikûr hatine ku destê wan di şehadeta pir şervan, fermandar û walatparêzan de heye.
Li ser zêdebûna êrişên dagîrkeriya tirkî, oprasyona Sondê ya li dijî sîxuran û êrkên ku dikevin ser milê ciwanên bakur û rojhilatê Sûriyê, Endamê Meclîsa Tevgera Ciwanên Şoreşger ya Herêma Efrînê Ehmed Mistefa ji me re axivî.
’QSD’ê rûmeta gelan parast’
Ehmed Mistefa diyar kir ku armanca dewleta tirkî ya dagîrker ya piştgiriya DAIŞ’ê, qirkirina gelên herêmê yên resen e û wiha axivî: “Armanc dewleta tirkî ya dagîrker qirkirina gelên herêmê yên resen, têkbirina projeya Netweya Demokratîk û dagîrkirina tevayiya herêmên Sûriyê bû. Lê bi saya berxwedana şervanên azadiyê , Hêzên Suriya Dmokratîk û yekîtiya gelên herêmê armanca wê pêk nehat û çetyeyên DAIŞ’ê li seranserî herêmên bakur û rojhilatê Sûriyê têk çûn. QSD’ê bi rizgarkirina tevayiya herêmên xwe ji cîhanê re da xuyakirin ku ti kes nikare vîna gelên herêmê bişkîne.”
’Dewleta tirkî bi piştgiriya hêzên navneteweyî komkujiyan dike’
Ehmed da xuyakirin ku piştî têkçûna DAIŞ’ê li heremên bakur û rojhilatê Sûriyê, dagîrkeriya tirkî dest bi êrişên ser herêmê kir û wiha dirêjî da axaftina xwe: “Piştî têkçûna DAIŞ’ dewleta tirkî bixwe êrişî herêmê kir. Êrişên dagîrkeriyê yên berfireh yên ser bakur û rojhilatê Sûriyê di 2018’an de li dijî Efrînê dest pê kirin û heta îro dewam dikin. Dewleta tirkî ya dagîrker di van êrişan de, li dijî gelê herêmê her hovîti kir û her cure çekên qedexekirî bi kar anîn. ”
Ehmed bal kişand ser bêdengiya hêzên navneteweyî ya li hemberî sûcên dewleta tirkî û wiha got: “Hêzên navneteweyî ji bo berjewendiyên xwe, çavên xwe ji kiryarên dewleta tirkî yên dijmirovî re digirin û xwe bedeng dikin. Ji her kesî re eşkere bûye ku Amerîka û Rûsya di rijandina xwîna gelên herêmê de hevkarên dewleta tirkî ne. Ji êrişên dewlata tirkî yên dawî tê xuyakirin ku dagîrkeriyê ji bo êrişên ser herêmê, erêkirina hêzên navneteweyî girtiye.
’Pêngava Sondê wê bibe tolhildan’
Ehmed da zanîn ku tevayiya êrişên dagîrkeriyê yên bi balafirên bêmirov bi alîkariya sîxuran tên kirin û wiha got: “Dagîrkeriya tirkî bi riya xayîn û sîxuran nebe nikare di vê astê de di êrişên xwe de bigihe armanca xwe. Tirkiye hewil dide bi van sîxuran tevlheviyê l herêmê çêke û îradeya gelên herêmê bişkîne. Ji bo dagîrkirina herêmê, Tirkiye tevayiya rêbazên bêexalq bi kar tîne. Dixwaze bi şerê taybet ciwanan bêbandor bike û herêmê vala bike.”
Endamê Meclisa Tevgera Ciwanên Şoreşger ya Herêma Efrînê Ehmed Mistefa bal kişand ser Operasyona Sondê ya QSD’ê dayî destpêkirin û wiha got: “Operasyona Sondê ya QSD’ê li dijî sîxur û xayînan dayî destpêkirin, bi serkeftî dewam dike û rêbazên ku Tirkiye bi riya wan sîxuran pêk tîne, eşkere kirin. Mistafa di dawiya axaftina xwe de bang li tevayiya ciwanên bakur û rojhilatê Sûriyê kir ku nekevin xefka dijminên dagîrker û alîkariya hêzên xwe yên leşkerî bikin.”
