Xalid Etê/Qamişlo
Parêzer û çalakvana başûrê Kurdistanê Çîro Şiwanî da zanîn ku dewleta tirkî bi komkujiyên welatiyan sînor tev derbas kirin û got, pêwîst e li hemberî êrişên dagîrkeriya tirkî gelên Iraqê hevgirtî tê bikoşin.
Dewleta tirkî ya dagîker 20’ê vê mehê li Gundê Geştiyarî Perexê yê Zaxo li dijî walatiyan komkujiyek kir û di encamê de 9 welatiyên Ereb ku di nava wan de 3 zarok jî hebûn şehîd bûn û 33 jî birîndar bûn.
Têkildarî êrişa Zaxoy û bertekên li dijî vê êrişê, parêzer û çalakvana başûrê Kurdistanê Çiro Şiwanî ji me re axivî. Şiwanî êriş û kiryarên dewleta tirkî yên hovane şermezar kirin.
`Dewleta tirkî serweriya Iraqê binpê dike`
Çiro Şewanî teqez kir ku ji ber êrişên Tirkiyê, li her qadê ziyan û kuştin çêdibin û ev nirxandin kir: “Ev ciyê êriş lê hatî kirin, ciyekî geştyarî bû û ev jî ne cara yekê ye ku dewleta tirkî êrişî ciyê sivîlan dike. Berî niha li Kanîmasî ya Silêmaniyê û gelek ciyê din jî êrişî sivîlan kir.”
Parêzera ji başûrê Kurdistanê herwisa ji aliyê qanûna navneteweyî ve êrişên Tirkiyê yên bênavber yên ser başûrê Kurdistanê nirxandin û got, êrişkar bi êrişên xwe, sînor tev derbas kirin. Serweriya Iraqê binpê dike û li dijî pîvan, qanûn û peymana Cinêvê tev digere. Heta di qanûn û pîvanên rewşên şer de jî, mafê Tirkiyê nîne êrişî welatekî din ku ti zirar jê nedîtiye bike. Ji ber wê mafê Iraqê yê gilîkirinê heye.
`Armanca êrişan jinûve dîzaynkirina Lozanê ye`
Çiro Şiwanî herwisa diyar kir ku dewleta tirkî xwediya proje û planên dagîrkeriya Iraqê ye û axaftina xwe wiha domand: “Her kes dizane ku dewleta tirkî bi êrişên xwe yên lser Iraq û başûrê Kurdistanê, dixwaze dagîrkeriya xwe ya berî Lozanê vegerîne. Herwiha li ser haman projeyê êrişî rojavayê Kurdistanê jî dike.”
`Divê Iraq maf û erkê xwe weke dewlet bi kar bîne`
Çîro şiwanî herwiha bal kişand ser erkê dewleta Iraqê û axaftina xwe wiha domand: “Li hemberî van êrişan divê Iraq, mafê xwe wek dewlet bi kar bîne û zorê bide Tirkiyê ku êrişên xwe rawestîne. Vê jî dikare bi riya dadgeh û qanûna navnetewyî bike. Iraq herwiha dikare bi riya aborî bersiva Tirkiyê bide û madeyên Tirkiyê li bazarên xwe qedexe bike. Ji ber wê derfetên ku Iraq pê bersiva Tirkiyê bide di qada leşkerî, siyasî û aborî de hene. Bi siyaseteke wisa wê derbeke mezin li Tirkiyê bixe.”
`Li hemberî êrişan pêwîst e gelên Iraqê hevgirtî bin`
Çalakvan û parêzera ji başûrê Kurdistanê Çîro Şiwanî da diyarkirin ku gelê Iraqê eger bi yekîtiya xwe nebin xwedîhelwest metirsiya dagîrkirina welat heye û axaftina xwe wiha qedand: “Banga min ji bo gelên Iraqê heye ku yek bin bin û li hemberî êrişên dewleta tirkî hevgertî bin. Lewra ji her demê pirtir pêwîstî bi hevgirtinê heye.”
