Desteya Kar û Barên Civakî û Xebitandinê bi hevkariya Komîna Wênesaz (Herêma Efrînê) bi navnîşan “Çîroka Axa Zeytûnê” çalakiyek li Helebê li dar xist. Di wê çalakiyê de tabloyek bi dirêjahiya 58 metreyan têkildarî dîroka bajarê Efrînê û pêvajoyên tê re derbas bûne rave dike hate pêşandan.
FacebookTwitterWhatsAppTelegram
Bi armanca gihandina dengê şêniyên kantona Efrînê yên koçber ku li kantona Şehbayê dimînin, Desteya Kar û Barên Civakî û Xebitandinê bi hevkariya Komîna Wênesaz (Herêma Efrînê) hemleyek ji bo pêşandina tabloyekê bi dirêjahiya 58 metreyan lidar xist. Hemle îro gihaşt Helebê.
Tablo li herêma Cibênat a rojhilatê taxê hate pêşandan. Gelek hunermend, endamên saziyên sivîl û bi dehan şênî hazir bûn.
Di çalakiyê de endamê Komîteya Çavdêr û hevserokê Nivîsgeha Kar û Barên Civakî ya Herêma Efrînê Egîd Xelîl axivî û got: “Di tabloyê de 3 qonax hene ku Efrînê tê re derbas bûne, ya yekê beriya dagirkirinê ku bi destkeftiyan dagirtî ye û ya duyemîn a dagirkirinê ye ku tijî êş û azar in û ya sêyemîn berxwedana domdar a li kampan e.”
Egîd teqezî bi berxwedanê û mezinkirina têkoşînê li hember êriş û gefên dagirkeriya Tirk kir.
Di çalakiyê de Şehla Ico ku tev li xêzkirina tabloyê bûye got: “Em ê bi hemû rêbazan li ber xwe bidin heta ku vegerin Efrînê û wê ji dagirkeran rizgar bikin, zimanê dayîkê belav bikin û wê fêrî nifşên din bikin.”
Der barê armanca çalakiyê de Egîd Xelîl got: “Me bi zanabûn tablo bi dirêjahiya 58 metreyan li gorî rojên berxwedana Efrînê çêkir. Zarokên 12 salî û gelek beşên din tev li vê çalakiyê bûne.”
Têkildarî zehmetiyan de, Egîd Xelîl got: “Me zehmetî di peydakirina pêdivî, caw û rengan de dît.”
Di dawiyê de Endamê Komîteya Çavdêr û hevserokê Nivîsgeha Kar û Barên Civakî ya Herêma Efrînê Egîd Xelîl destnîşan kir ku ew amadekariyan dikin ku tabloyê li seranserî herêmên Bakur û Rojhilatê Sûriyê pêşkêş bikin piştî ku li Şehba û Helebê pêşandan. Her wiha hêvî kir ku derfet hebe heman wêneyê li pêşiya NY`yê pêşkêş bikin da ku azarên şêniyên Efrînê bi rêya tabloyê ragihînin.
ANHA
