Berdevka Dîwana Wêjeyê derbarê encamnameya ‘Hefteya Wêjeyê’ de got “Di demên pêş de li gorî rewşa herêmê emê komxebateke taybet ji bo wêjeya jinan bi rêxistin bikin.”
FacebookTwitterWhatsAppTelegram
Îsal cara yekemîn Dîwana Wêjeyê ya Bakur û Rojhilatê Sûriyê rêzeçalakiyên `Hefteya Wêjeyî` li dar xist.
Piştî bidawîkirina çalakiyan encamnameyeke hat eşkerekirin. Têkildarî wê berdevka Dîwana Wêjeyê ya Bakur û Rojhilatê Sûriyê Narîman Evdikê ji me re axivî.
Narîman Evdikê da xuyakirin ku wan dixwest tevlêbûna rewşenbîr, nivîskar, helbestvan û wêjevanên Bakur û Rojhilatê Sûriyê zêdetir bûya, lê xwesteka wan bi cih nehat û got: “Encamên Hefteya Wêjeyî kar û xebatê Dîwana Wêjeyê ya salan diyar dike. Ji ber vê yekê me pêwîstî bi tevlêbûneke geştir didît. Tişta em dizanin sedema wê jî ji ber rêzeçalakiyeke nû bû. Em hêvî dikin ku di salên bê de geştir be.”
Narîman wiha pê de çû: “Em gihaştin asta ku em dikarin xalên
sereke bidin ber hev. Ji bo pêşxistina wêjeya jinan em ê di demên pêş de komxebatekê li ser çend rojan organîze bikin, dê jinên ku nû dest bi nivîsê kirine jî tev li komxebatê bibin, em ê li ser encamê ku ji komxebatê derkevin jî bixebitin. Dibe ku em di vê salê de mîna vê komxebatê 2 caran li dar bixin.”
Li ser beşa rexneya wêjeyê jî Narîman got: “Em ê salonekê (dîwan), di wê salonê de wê rexneya berhemên wêjeyî ya herêmî bê girtin, dê tê de her 15 rojan carekê berhemek bê diyarkirin û dê endamên dîwanê wê berhemê bixwînin û binirxînin. Ev dîwan dê li Kobanê jî hebe.”
Narîman Evdikê da zanîn ku dibe ku encamên ji dîwana rexneya wêjeyê derkevin, bikin gotar û got: “Ew gotar jî dibe ku em bikin rêzegotar û piştre bikin pirtûk. Mixabin ji ber êriş û gefên dewleta Tirk gelek kar û xebat tên sekinandin, ji ber wê jî rewşa pêkanîna projeyan jî nayê nasîn.”
ANHA