Daîreya Avê ya Şaredariya Gel ya Dêrikê gelek proje ji bo çareserkirina qutbûna avê pêk anîn. Tê payîn ku projeyên din jî pêk bîne ku yek ji wan sererastkirina torên sereke û kolanna bîran e.
FacebookTwitterWhatsAppTelegram
Daîreya Avê ya Şaredariya Gel ya Dêrikê bi hevkariya Desteya Enerjiyê ya Herêma Cizîrê, 3 bîrên ava vexwarinê bi xeta kehrebeya Nexweşxaneya Nîştimanî ve girê dan, ew jî ev in; bîra Merdûdo, bîra Mesakin û bîra Hevgirtina Cotkaran.
Ev bîr wê avê bi awayekî domdar derxin bê ku qutbûna kehrebeyê bandorê li wan bike.
Li gorî daîreyê ku ji bo çareserkirina pirsgirêka kêmbûna avê li Taxa Şehîd Xebat, bîreke din dê li taxê were kolandin.
Yek ji girîngtirîn projeyên Daîreya Avê di dema borî de, nûkirina
torên avê yên taxên Dêrikê bû, ji ber ku piraniya wan xetan kevn û rizyayî bibûn.
Hevserokê Daîreya Avê ya Dêrikê Mistefa Ehmed destnîşan kir ku armanca wan ji wê projeyê ew bû ku bîran bi xeta kehrebeya nexweşxaneyê ve werin girêdan, ji bo qutbûna kehrebeyê bandorê li derxistina avê neke.
Mistefa Ehmed wiha lê zêde kir: “Bîr li hersê deverên Merdûdo, Mesakin û Hevgirtina Cotkaran in û ev proje bi hevkariya Desteya Enerjiyê ya herêma Cizîrê û Daîreya Çavkaniyên Avî ya Bakur û Rojhilatê Sûriyê ya ku komîteyên Daîreya Kehrebeyê yên Dêrik û Til Koçer û Daîreya Avê ya Dêrikê rêveberiya wê dikin, pêk hat.”
Ehmed wiha domand: “Proje ji bo derxistina ava vexwarinê û dagirtina torên sereke û şaxî. Bi taybet li ku bîr lê hene. Lêçûna projeyê jî nêzî 25 hezar dolar bû. Proje dê krîza avê li hemû taxên Dêrikê çareser bike.”
Tê payîn ku hemû torên taxên Dêrikê jî werin sererastkirin da ku kêmbûna avê li navçeyê bê çareserkirin.
ANHA
