Mihemed Xanim/Qamişlo
Mistefa Ebdo: Vîn û berxwedaniya gelên bakur û rojhilatê Sûriyê ji dagîrkeriya tirkî û çeteyên wê mezintir e.
Bi armanca şikandina vîna gelên herêmê, bi sedê salan e ku dagikeriya tirkî polîtîka qirkirinê li ser van gelan dimeşîne û gelek sûcên dijî mirovayiyê kirine. Di rojên dawî de, dagîrkeriya tirkî û çeteyên wê, êriş û gefên xwe li dijî herêmên bakur û rojhilatê Sûriyê zêde kirine. Li ser kiryarên dewleta tirkî ya faşîst û gefên wê li dijî herêmên bakur û rojhilatê Sûriyê, nivîskar û endamê Partiya Yekîtiya Demokratîk (PYD), Mistefa Ebdo ji me re axivî.
Mistafa Ebdo bal kişand ser têkçûyina siyaseta dewleta tirk ya tevahî qadan de û wiha got: “Di demên dawî de, dewleta tirkî ya dagîrker û çeteyên wê êriş û gefên xwe li dijî herêmên Rêveberiya Xweser zêde kirine. Hin sedemên van êrişan girêdayî rewşa Sûriyê, hin girêdayî rewşa cîhanê û Tirkiyê ne. Dewleta tirkî ya faşîst di hundirê xwe de, di nava kirîzan de ye. Di mehên borî de, siyasetên wê li tevayî qadan têk çû, lewra ew dixwaze bi êrişên ser bakûr û rojhilatê Sûriyê hin armancan bidest bixe. Lê hisabên wê şaşin û eger êrişeke nû pêk bê wê vê carê deriyê dojehê ji bo dagîrkeran vebe û wê Tirkiyê birûxe. “
’Armanca dagîrkeriyê tunekirina destkeftiyane’
Mistefa Ebdo diyar kir ku dewleta tirkî têkçûyina xwe ya hindirin bi êrişên li ser kurdan re vedşêre û axaftina xwe wiha domand: “Tevayiya hikumetên Tirkiyê erîşên ser gelê kurd ji xwe re kirine çand û bi riya wan êrişan pirsgirêkên xwe yên hundirîn vedişêrin. Bi destpêkirina şoreşa Sûriyê re, gelê Kurd sîstemeke demokratîk ava kir. Kurdan pêşengiya projeya Neteweya Demokratîk kir û bi awayekî serkeftê herêm bi rê ve birin. Projeya Neteweya Demokratîk bû bingeha rêxistinbûn û azadiya gelên herêmê. Dema dagîrkeriya tirkî dît ku ev projeya demokratîk pêşdikeve û wê çareseriyê bi xwe re bîne seranserî herêmê, li ser xwe xeter dît. Lewra dixwaze ji aloziya Sûriyê sûd bigre û amancên xwe yên dagîrkiriyê pêk bîne. Dewleta tirkî ya faşîst li ku derê hebûna azadiya Kurdan hebe, êrişî wê derê dike.”
’Rûsya û Amrîka di sûcên ku dagîrkeriya tirkî dike hevkarin’
Ebdo da xuyakirin ku dewletên wekî Rûsya û Amêrka, ji bo berjewendiyên xwe beşdarî krîza Sûriyê bûn û axaftina xwe wiha domand: “Dagîrkriya tirkî her dem hewl dide ji pirsgirêkên Rojhilata Navî û cîhanê sûd bigre. Li ser dijwestiya di navbera welatan de dilîze û amancên xwe pêk tîne. Ji ber ku cih û erdîngariya Tirkiyê ji bo dewletên rojavayî girînge, her kes dixwaze bi riya bazarên ser kurdan aramancên xwe bidest bixe. Dagîrkeriya tirkî li ber çavê tevayiya cîhanê komkojiyan dike. Rûsya û Amrîka qaşo li herêmê garantor in lê xwe bêdeng dikin. Dîroka her du dewletan ji her kesî re diyar e. Ji bo berjewendiyên xwe, çi ji destên wan tê dikin. Ev her dû hêz ji gelên azadîxwaz re dijminin.“
’Armanca dagîrkeriyê çewisandina vîna gel e’
Ebdo da zanîn ku armanca êrişên dagîrkeriya tirkî yên li ser bakur û rojhilatê Sûriyê, têkbirina projeya Biratiya gelan e û axaftina xwe wiha domand: “Tirkiyê dixwaze xeta demokrasî û azadiyê tine bike. Dagîrkerî projeya Netewya Demokratîk li ser xwe xeter dibîne û bi riya bicihkirina malbatên çeteyan li xakên dagîrkirî, dixwaze gelên herêmê yên resen tine bike û ji cêhanê re bibêje ku hejmara Kurdan li herêmê kêm e. Projeya xwe ya guhertina demografî bi her şêwazî dewam dike. Herwiha dewleta tirkî ya dagîrker bi êrişan, îradeya gel bişkîne. Dagîrkerî bi êrişên xwe yên ser sivîlan, polîtîkaya xwe ya qirkirinê didomîne. Siyasetên wê yên dagîrkeriyê li tevayiya qadan têk diçû, lewra ew bi awayekî hovane êrişî Rêveberiya Xweser ya bakur û rojhilatê Sûriyê dike”
’Yekîtya gelên herêmê wê serkeftinê misoger bike’
Endamê Meclisa Giştî ya Partiya Yekîtiya Demokratîk (PYD), Mistefa Ebdo da zanîn ku yekîtiya gelên herêmê wê planên dagîrkeran vala derxe û axaftina xwe wiha qedand: “Di vê pêvajoyê de ya herî girîng birêxistinbûne. Pêwîste gelên herêmê xwe bi rêxistin bikin û li derdora rêveberiya xwe bibin destek. Piroje û fikrê Neteweya Demokratîk, ji gelên rojhilata navî re xelasiya ji dagîrkerî û serdestiyê ye. Lewra divê gelên herêmê li gor wê xwe pêş bixin û nirxên hatine bidestxistin biparêzin. Ji her demê zêdetir pêwîstiya gelên herêmê bi yekrêziyê heye.”
