Malbatên girtiyan li ber Girtîgeha Kiriklarê li hev civiyan û banga şiyariyê li raya giştî kirin.
Malbatên girtiyên nexweş û girtiyên ku infaza wan hatiye şewitandin û nayên berdan, di li ber Girtîgeha Kiriklarê ya Îzmîrê ya Tirkiyê li hev civiyan. Malbatan, pêşmalkên li ser wan “Ji girtiyên nexweş re azadî” nivîsandî li xwe kirin û dowîzên “Bêdeng nebe û nebe hevparê sûc ji girtiyên nexweş re azadî” û “Bila girtiyên nexweş bên berdan” hilgirtin.
‘WÊ EV ZILM HETA KÛ DERÊ BIDOME?‘
Dayika Firat Yagmekan ku li Girtîgeha Kiriklarê girtî ye Sûltan Yagmekan axivî û diyar kir ku ji bo kurê xwe û hemû girtiyan li ber girtîgehê ne û got: “Girtiyên ku înfaza xwe temam kirine divê demildest bên berdan û di bin çavdêriya malbatên wan de tedawiyên wan bên kirin. Li girtîgehan her roj mirin hene. Em vê qebûl nakin. Em dixwazin ku hemû sazî û dezgehên hestiyar piştgiriya me bikin. Weke malbatên girtiyan em bi şev jî ranekevin. Xwarinê nadin zarokên me. Wê ev zilm heta kuderê bidome?”
BANGA LI WEZARETA `DADÊ`
Yagmekan, ji bo zextên li girtîgehan bi dawî bibin bang li Wezareta Dadê kir û ev tişt got: “Zarokên me jixwe di girtîgehan de ne, çima ev zilm tê kirin? Li girtîgehan ne edalet, ne wijdan ne jî wijdan maye. Em naxwazin darbest ji girtîgehan derkevin. Heta ku zarokên me li girtîgehan bin, em kesek tenê jî bimînin em ê li her derê têbikoşin.”
ANF
