Serbest Etê/Qamişlo
Endama Baroya Yekîtiya Jina Êzîdî got, Rêveberiya Xweser ya demokaratîk ya Şingalê Hêviya gelên Iraqê ye. Ji ber wê bi orgenîzekirina dewleta tirkî ya dagîrker û pêkanîna hevkarên wê qirkirna Êzîdiyan didominin. Lê divê wijdana cîhanê qirkirineke nû ya Êzîdiyan qebûl neke.
Piştî peyama 9`ê Cotmeha 2020`an ya Tirkiye, Hikumeta Iraqê û PDK`ê imze kirîn, êrşên ezmanî yên dewleta tirkî ya dagîrker û hewldan û êrişên artêşa Iraqê, li hemberî Xweseriya Demokratîk Ya Şingalê bênavber didomin. Herî dawî artîşa Iraqê 2`yê Gulanê bi tank, top û çekên giran êrişî hêzên Êzîdxanê yên navçeya Sinûnê ya Şingalê kir û malên walatiyan topbaran kirin. Di encamê de şervanekî YPŞ`ê şehîd bû û sê walatî jî birîndar bûn.
Têkildarî êrişên ser Rêveberiya Xweser ya Şingalê û hêzên Êzîdxanê, endama Baroya Yekîtiya Jinên Êzîdî ya Helebê Ranya Cefer ji rojnameya me re axivî.
`Bi saya şervanên Êzîdxanê herêm ji çeteyên DAIŞ’ê hat parastin`
Ranya bîr xist ku piştî hewldana qirkirinê û fermana 3`yê Tebaxa 2014`an ya bi destê DAIŞ`ê, şervanên Êzîdxanê û gerîlayên PKK`ê ew herêm ji destê van çeteyan paqij kirin û ev nirxandin kir: “Bi saya berdêl û têkoşîna wan jî Rêverberiya Xweser ya Demokartîk Ya Şingalê ava bû. Ev xweserî ji civaka Êzîdî, gelê Kurd û tevayiya gelên Iraqê yên azadîxwaz re bû hêviyeke mezin. Lê desthilatên dîktator yên li Enqere, Hewlêr û Bexda ji vîna azad ya gelan ditirsin. Li ser vî bingehî peyman û êrişên hevbeş yên dewleta tirkî ya dagîrker, hikumeta Kazimî û PDK`ê, li ser Xweseriya Şingalê bênaveber didomin.”
`Plan dagîrkirina Kurdistanê û xaka Ereban e`
Endama Baroya Yekîtiya Jinên Êzîdî ya Helebê herwisa bal kişand ser rola dewleta tirkî ya dagîrker di plan û êrişên ser Xweseriya Demokartîk ya Şingalê de û axaftina xwe wiha domand: “Tirkiye bi amanca ku xewna Osmanî û Mîsaqa Milî di sedesala 21’ê de vegerîne, êrişan organize dike û her du hevkarên xwe Hikumeta Iarq û PDK`ê erkdar dike. Hewl didin ku Şingalê ji Iraqê û başûrê Kurdistanê ve qut bikin, herwisa Şingal ji Rojava bi riya lêkirina dîwar qut bikin. Ji ber wê ol û civaka Êzîdî ya ku mîrata Kurdan parastiye, dikin amanc. Bi peymana 9`ê Cotmehê dixwazin koka gelê Kurd di riya civaka Êzîdî de biqelînin. Ji ber wê dewleta tirkî ya dagîrker êrişî başûr û qadên gerîla dike û PDK` jî hevkariya wê dike. Heman demê hikumeta Iraqê bi destekdayîn û bi propagandaya PDK`ê êrişî xweseriya Şingalê dike. Armanc dîsa dagîrkirin û qirkirina gelê Şingalê ye. Lê vê carê ev xeter e, wê di erdnîgariya Şingalê tinê de sînordar nemîne, di planên Tirkiyêde dagîkirina Başûr û Iraqê tevê heye. Ji aliyekî din ve jî, dixwazin Rojava dorpêç bikin û Rêveberiya Xweser ya bakur û rojhilatê Sûriyê lewaz bikin.”
` Îro Şingal be, sibe wê tevayiya Iraqê be`
Endama Baroya Yekîtiya Jinên Êzîdî ya Helebê Ranya Cefer teqez kir ku wê ev êriş vîna civaka Êzîdî û gelên azadîxwaz nikaribin bişkînin û axaftina xwe bi vê peyamê qedand: “Wek Êzîdiyên Rojava, banga me ji gelê Kurd, Ereb, Xiristiyan û tevayiya gelên Iraqê re ew e ku, li hemberî êriş, siyaset û komployên qirkirinê, xwedîhelwest bin. Divê dayîk û jinên Başûr û Iraqê, zarokên xwe tevlî êrişkaran nekin. Lewra mixabin, em di sedsala 21’ê de ne û hê Kurd hevkariya dagîrkeran dikin. Dewleta tirkî, Hikumeta Iraqê û PDK dixwazin fitne û dekûdolaban di nava gelan de biafirînin. Li ser vî bingehî ji aliyekî din ve êrişên reşkirina civaka Êzîdî li nava civak û gelan didome. Bi siyaseta reşkirinê, rojane fermanan li ser civaka Êzîdî pêk tînin. Divê Saziyên Mafên mirovan û cîhan tev berxwedana mafdar ya Êzîdxanê, rewa bibînin û li hemberî plan û êrişan, wijdana mirovayiyê bilive û qirkirineke nû qebûl neke. Jixwe ku îro Şingal be, sibe wê tevayiya Iraqê be.”
