Ronahî-Eyn Îsa
Bi pêmana Cejna Remezanê, koçberên bajarê Girê Spî hêviya wan ew e ku îsal cejna xwe li mal, gund û warên xwe pîroz bikin. Koçberê bi navê Casim El-Îbrahîm got, piştî dagîrkirina bajarê me ji aliyê dewleta tirkî ya dagîrker ve, xweşiya cejnê jî nemaye.
Dewleta tirkî ya dagîrker bi êrişên xwe yên hovane yên ser bakur û rojhilatê Sûriyê 9’ê Cotmeha 2019’an bajarê Girî Spî dagîr kir. Nêzî sed hezar kes neçarî koçberiyê bûn. Ji bo xwedîderketina li koçberan 22`yê Mijdarê bi pêşengiya Meclisa Kantona Girê Spî û aliyên pêwendîdarên Rêveberiya Xweser ya bakur û rojhilatê Sûriyê, kampa Girê Spî hat avakirin.
Bi armanca guhertina demografiya herêmê, dewleta tirk ya dagîrker û çeteyên wê yên bajarê Girê Spî dagîrkirin. Bi boneya Cejna Remezanê koçberên kampa Girê Spî hêvî dikin ku vegerin cih û warên xwe. Li ser mijarê rojnameya me nêrîna koçberên kampê girt.
`Em in xwediyên vê xakê û cejna herî mezin jî wê rizgarkirina bajarên me ji dagîrkeran be`
Koçber Casim El-Îbrahîm wiha got: “Niha em derbasî sala çaran ya dagîrkirina dewleta tirkî ya faşist û çeteyên wê dibin. Hêviya me ew e ku em bi îrade û berxwedana xwe di demeke nêz de, bajarên xwe ji dagîrkeriya dewleta tirkş rizgar bikin. Ji bo wê em dibêjin kêfxweşî û cejna herî mezin wê roja rizgarkirna cih û warên me be.”
Casim wiha axaftina xwe domand: “Rizgarkirina bajarên me mîna Efrîn, Serê Kaniyê, Girê Spî dikeve ser milê me tevan. Lewra ev xaka me û ji mafê me ye ku em bi azadî û bi rûmet lê bijîn. Bila cîhan tev vê yekê bizanibin, bi taybetî dewleta tirk û çeteyên wê. Bi saya berxwedana şervanan û yekbûna gel bi şervanê xwe re emê teqez vegerin bajarê xwe. Lewra yê xwediyê xakê emin.”
`Bêdengiya dewletan kûrkirina kirîzê ye`
Ji aliyekî din koçbera bi navê Maha Alwîs bêdengiya navneteweyî û bêhelwestiya civaka navdewletî derbarê çareserkirina pirsgirêka kirîza Sûriyê ya ji sala 2011’an ve, şermezar kir, û ev yek weke hevkariyek li dijî daxwazên gelê Sûriyê ji bo azadiyê destnîşan kir.
Maha Alwîs wiha got: “Cejna Remezanê ya ku dê di nava çend rojan de were, ji ber koçberiyê kêfxweşiya wê di dilê me de kêm me. Lewra dagîrkirina bajarê me ji aliyê dewleta tirk û çeteyên wê, me ji merov û dostên me dûr kir. Tevî ku em di koçberiyê de gelek zehmetiya dikşînin, lê armanca dijmin pêk nayê û em vîna xwe naşkînin. Bi saya berxwedana şervanan û hêza QSD emê bi kêfxweşî, di demeke nêz de cejnên xwe li bajarê xwe pîroz bikin.”
Meha Alwîs di dawiya axaftina xwe de bal kişand ser girîngiya hevgirtin û hevkariya di navbera hemû pêkhateyan de; bilindkirina têkoşîn û berxwedanê heta serkeftinê.
