Ahmet Aktaş
Hema di serî de, ev ne şerekî di navberaa Rûsya û Ukrayna tenê de ye. Yekser di navbera Rûsya û Amerîka de ye.
Herwiha mirov dikare bêje di navbera du eniyan de ye; yek, eniya DYE, YA, NATO û hwd, dudu; eniya Rûsya, Çîn, Îran, Nîkaragua û hwd. Dikare were gotin; êdî cenga cîhanê ya 3. germtir dibe.
Bêguman di her bûyerê de, pêşî her kes bala xwe dide ka gelo bandora wê çendîn li ser welatê me, têkoşîn û jiyana gelê me heye? Jixwe li cîhanê, bi zanistî-diyalektikî jî têkiliya bûyeran tevan bi hev re heye.
Li gorî serdemê û dewletên yekser têkildarî şerê Ukrayna ne, hema mirov dikare bêje; ne yekser be jî, di asta yekê de û bi giranî bandora xwe li welat û gelê me dike.
Her du dewletên, serkêşiyê hum li vê bûyerê hem li siyaseta cîhanê dikin, bi taybetî li Rojava û Başûrê Kurdistanê, yekser bibandor in.
Li gel van dewletên sereke, dewleta Tirkan jî yekser têkildarî Ukrayna û bi giştî Kurdistanê yê.
Di her şer û cengê de, hinek dewlet kêm, hinek jî zêde zerar û ziyanê dibînin. Dibe ku ji hinek aliyan ve hinek dewlet ji yên din serkeftîtir bin, lê bi gişti, kêm-zêde her alî derban dixwe.
Di vî şerê Ukraynayê de jî, hema ji niha ve aliyê qezenc kirî nîne, hemê di zerar û ziyanê de ne.
Hinek şîrove hene dibejin “dibe ku dewleta Tirkan, vî şerî ji xwe re fersend bibîne û zêdetir êrîşî Rojava û Başûr bike”!
Dibe ku bêje “Rûsya û Amerîka li Ukrayna bi hev ketine û” û êrîşan girantir bike.
Lê, nexêr ev pêşbînî pir lawaz e û dibe şaş be. Lewra ev dewlet berjewendên xwe yên ti deveran ji bîr nakin. Herwiha dewleta Tirkan jî, di nava heman aloziya van dewletan de ye û heta mirov dikare bêje, ji hinek aliyan ve, ji wan zêdetir tengav e û bêçare ye.
Ji ber ku xwedêgiravî “bêalî ye” û her du dewletan û cîhanê dixapîne! Hem ewqas SÎHA û Bayraktar TB2 dide Ukrayna û di şer de pesindariya van firokeyên xwe yên kujer dide hem “bêalî ye” û tew navcîtiyê jî dixwaze! Herwiha jibo geştiyên cengê yên DYE derbasî Deryareş bike, hewl dide pê li Peymana Montro jî bike. Û Rûsya te nabîne he?
Êdî ew hevkariya Rûsya, Tirkiye û Îranê jî têk çû. Jixwe li gelek welatan hatibûn dijberî hev. Piştî vê bûyerê, êdî wê pirtir li Rojava û Başûr, bi giştî li Suriye û Iraqê jî nakokiyên wan dijwar bibin.
Heta niha Rûsya û DYE, bi giştî li Rojhilata Navî, bi taybetî li ser Rojava û Başûr li hev hatibûn. Herwiha Îran jî di nav de li gel Tirkiyê jî li hev kiribûn.
Lê li ser rêveberiya Bexdayê jî nakokiyên Tîrkiye û Îranê gelek dijwar bûne. Ji destêwerdana Tirkiyê gelek hêrs bûye û General Ismail Kaanî şand Bexda û Hewlêrê, hilbijartina Serokkomariyê da rawestandin. Xaza xwezayî li ser Tirkiyê qut kir. R.Erdogan, ji naçarî xaz ji Nêçîrvan Berzanî xwest!
Di encamê de, bi giştî destê van dewletên mijara gotinê, lawaz bûue. Lewma, ji wê pêşbîniya êrîşan pirtir, pêşbîniya ji berê pirtir hewcedarî Tevgêra Gelê Kurdistanê bibin ketiye rojevê. Helbet dîsa jî hosteyî û hişyarî divê.
