Ji fermandarên YPJ’ê Bêrîtan Qamişlo diyar kir komploya 15ê Sibatê komploya li ser tinekirina vîna civakê bû û got, tecrîda li ser Rêber Abdullah Ocalan li ser tevayiya mirovayiyê ye û divê bê zanin ku bi saya keda Rêber Ocalan jin bûn xwedîîrade.
FacebookTwitterWhatsAppTelegram
Ji fermandarên YPJ’ê ya herêma Cizîrê Bêrîtan Qamişlo 23’emîn salvegera komploya navneteweyî ya li ser Rêber Abdullah Ocalan şermezar kir û wiha got: “Di roja 15`ê Sibatê de dewletên navneteweyî xwestin vîn û îradeya gelê Kurd tune bikin, ji ber vê yekê li ser Rêber Apo Komployeke qirêj pêk anîn.”
Bêrîtan Qamişlo derbarê bandora ramanên rêber Ocalan li ser civakan de wiha wiha got: “Fikir û ramanên Rêber Apo bû vejîna gelê Kurd. Derketina Rêber Apo di sedsala 20’an de, tişta ku dijmin di gelê Kurd de kuştibû ji nû ve zîndî kir. Rêber Apo esaleta tekoşîn û îradeya civaka Kurd derxist holê. Heger em dixwazin mirovahiyê azad bikin pêwîste em ji gelê Kurd de dest pê bikin. Ji bo mirov azad bibe ji bo desthilatdarî tune bibe di serî de pêwîste civaka Kurd ji vî tiştî xilas bibe. Mixabin bi hezarê salan e gelê Kurd rastî qirkirinê tê heya roja me ya îro jî dixwazin me qir bikin. Lê bele Rêber APO Kurd ji qirkirina çandî û fîzîkî xilas kir. Rêber Apo di şexsê gelê Kurd de mirovahî da pêş.”
`Êrîşa li ser Rêber Ocalan êrîşa li ser mirovayiyê ye`
Bêrîtana Qamişlo wiha domand:” Dema ku mirov li rastiya komployê û ev êrîşên ku li ser Serokatî dinêre, mirov dibîne ku ev êrîş li ser tevahî mirovahiyê tê kirin. Xwestin Rêbertî bikin nava çar dîwaran ji bo ku kirinên sîstema xwe pêk bînin. Ji ber ku di nava vê civakê de kesayetekî wekî Serokatî derketiye û sîstema modernîteya Kapîtalîst û sîstema desthilatdariyê qebûl nake. Serokatî got ‘hûn nikarin vê qirêjiya xwe li ser gelê me bidin meşandin’ bi vê êrîşa li ser Serokatî ev dewletên desthilatdar xwestin bi fîzîkî dilgirtina Serok Apo re xeyalên mirovahiyê bin pê bikin û bifetisînin. Ango dixwazin bêjin ku divê mirov li hember wan dernekevin û di tarîtiyê de bijîn. Piştî ku Rêbertî hat girtin bi awayekî pir berfireh li ser Rojhilata Navîn plan hatin amadekirin.
`YPJ’ê bi saya keda Rêber Ocalan xwe ava kir`
Bêrîtan Qamişlo bal kişand ser rola fikrê rêber Ocalan di avakirina YPJ`ê de û wiha berdewam kir:” Rêber Ocalan ji bo gelê Bakur û Rojhilatê Sûriyê û hêza jin gelek derfetên tekoşînê dan. Jinan bi tekoşîna Rêber Ocalan hebûna xwe nas kir. Li hemberî ferasata civakê ya ku jin di hinek karan de sînorda dikir, jinan di nava şoreşê de mîsyona pêşengtiyê girte ser milên xwe. Heger em dixwazin civakeke nû ava bikin, pêwîste her ferdek di nava vê civakê de xwedî tekoşîn be. Ji ber ku di Rojavayê Kurdistanê de gelek malbatan Rêbertî dîtibûn û bi salan li cem wî mabûn, gelek malbata zarokên xwe diyarî vê şoreşê kirin. Ji bo ku ev şoreş bi ser bikeve gelek jinan fedekariyên pir mezin kirin. Ev hişmendî jî weke jin, me ji Rêber Apo girtiye û weke hêza YPJ’ê di vir de pir fedayitiyên mezin kiriye. Şervanan bi şehadetên ku çêbûn, birîndariyên ku çêbûn bi cesareta xwe ya di nava şer de bi sekne werek tevlî şoreşê bûn. Bi saya keda bi salan ya Rêber Apo, YPJ îro xwedî li welat û civaka xwe derdikeve. Rastiya YPJ’ê ev e. Piştî ku YPJ’ê li Bakur û Rojhilatê Sûriyê hat avakirin, di nava civakê de guhertin û vegûhertinên mezin çêbûn.
`Em bi xeyalên ku Serok di nava xwe de bibînin dijîn`
Fermandara YPJ’ê Bêrîtan Qamişlo bal kişand tecrîda girankirî ya li ser rêber Ocalan û wiha got: “Ev 23 sal in ku Serokatî berxwedaniyê dike û rûbirû tecrîd û îşkenceya derûnî ya mezin tê. Dixwazin ku fikir û felsefeya Serokatî di hucreyekê de bifetisînin. Lê em dizanin ku çi dibe bila bibe, Serok fikrê xwe yê azad gihandiyê tevahî cîhanê. Em weke civak weke jin û weke kesayet em deyndarê Rêbertî ne û ew xeyalê me yê ku em bikaribin Serokatî bibînin û bi Serok re jiyan bikin, lê guhdar bikin heye. Serokatî kesayetê ku herî zedê heq dike ku di cîhaneke xweş de jiyan bike ye. Pêwîste di çarçoveya pêngava dem dema azadiya Rêber Apo ye, di her çar perçê Kurdistanê de û di tevahî cîhanê de her kes bibe xwedî helwest. Ne bes gelê me yê Kurd û gelê me yê Ereb di hemû cîhanê de divê civak û kesayatên azadîxwaz û demokrasîxwaz tevlî vê pêngavê bibin. Azadiya Rêber Apo rizgarkirina mirovahiyê ye, wê demê wê pergal jî mecburî bibe pirsgirêkên civakê çareser bike. Heya ku Serokatî di zindanê de be wê zext û zordarî li ser me hebe. Erk û misyona ku dikeve ser milê me gelekî giran e, bi derketinekê û bi meşekê ev tenê têrê nake. pêwîste em asta xwe ya tekoşînê xurt bikin û bikaribin zêdetir xebat bikin. Çi ji aliyê fikrî de, çi ji aliyê jiyanî û leşkerî de misyona ku dikeve ser milê me, xwedî derketina Rêber Apo ye.”
ANHA