Li gorî agahiyên çavkaniyan ji kantona Efrîna dagîrkirî dayîn, çeteyan li derdora 280 darên zeytûn û gozan birîne û milkên welatiyên resen difroşin.
Çavkaniyan diyar kir ku çeteyên dewleta tirkî ya dagîrker 12’yê Tebaxê li gundên Çoqê û Stêr yên navenda bajarê Efrînê li derdora 130 darên zeytûnan yên welatiyan birîne.
Li gorî çavkaniyan, li gundê Coqê 90 darên zeytûnan yên Osman Hemo û li gundê Stêr 40 dar yên welatiyê bi navê Nûrî Mihemed hatine birîn.
Li navçeya Bilbilê jî di heman rojê de çeteyên “Lîwa Şemal” li derdora 90 darên zeytûnan û 10 darên gozan yên welatiyê bi navê Resûl Mihemed birîne.
Çavkaniyan herwiha da zanîn ku kesên li Cindirêsê jî bi cih bûyîn, li derdora 50 darên zeytûnan yên Ebdo Mûrad yê ji gundê Keferdelê birîne.
Li navenda bajarê Efrînê jî çeteyên “Ehrar El-Şerqiye” dest danîn ser avayiya Komeleya Buhar ya nêzî navenda çandê. Komele ya welatiyê bi navê Mihemed Mistefa Elî yê ji gundê Bablîtê ye.
Li aliyekî din jî çeteyên “Ehrar El-Şerqiye” xaniyê Cûma Mihemed yê li derdora çerxeriya Maratê bi 2 hezar dolarî firotine kesekî ji Helebê. Cûma Mihemed Kurdekî gundê Xelnêrê ye.
Li gorî çavkaniyan, kesek ji herêma Qelemon ya gundewarê Şamê ku li taxa Eşrefiyê ya navenda bajarê Efrînê bi cih bûye, xanî û dikana welatiyekî bi navê Ramî Îbrahîm yê ji gundê Dêr Sewan yê navçeya Şerayê firotine. Çavkaniyan diyar kir ku xanî bi hezar û 400 dolarî û dikan bi 800 dolarî firotine çeteyekî “Feyleq El-Şam” ku ji Idlibê ye.
ANHA