Du endamên PYD’ê yên ji aliyê çekdarên PDK’ê ve hatîn revandin, hatin berdan. Lê Nûnerê Rêveberiya Xweser yê Hewlêrê nehat berdan.
Nûnerê Têkiliyan yê PYD’ê yê Hewlêrê Mistefa Osman Xelîl, Nûnerê Rêveberiya Xweser yê Hewlêrê Cîhad Hesen û Endamê PYD’ê yê Hewlêrê Mistefa Ezîz Mistê 10’ê Hezîrana 2021’ê dema diçûn pêşwaziya mêvanên xwe, li Balafirgeha Hewlêrê ji aliyê çekdarên PDK`ê ve hatibûn revandin.
Derbarê sedema revandinê de heta niha rayedarên PDK’ê ti agahî nedabûn PYD’ê û Rêveberiya Xweser. Herwiha daxwaziyên hevdîtinê jî nehatibûn pêşwazîkirin.
Piştî 50 rojan Nûnerê Têkiliyan yê PYD’ê yê Hewlêrê Mistefa Osman Xelîl û Endamê PYD’ê yê Hewlêrê Mistefa Ezîz Mistê hatin berdan.
Lê Nûnerê Rêveberiya Xweser yê Hewlêrê Cîhad Hesen bê ku ti sedem werin nişandan, nehat berdan.
Li gorî agahiyên Nûnertiya Rêveberiya Xweseriya Demokratîk ya bakûr û rojhilatê Sûriyê ya başûrê Kurdistanê dayîn, di dema girtinê de ti sûcdarî li ser her du endamên PYD’ê nehatina isbatkirin û bê ku derxin dadgehê hatine berdan.
Nûnerên Rêveberiya Xweser diyar kirin ku xwestine bizanin ka çima endamê wan Cîhad Hesen nehatiye berdan. Lê bersivek ji wan re nehatiye dayîn.
Rojnews