Rojnameya Ronahî

Salvegera 9’an ya Şoreşa 19’ê Tîrmehê

Di Jul 25, 2021

Ebûdê Mexso

Şoreşa Rojava di 19’ ê Tîrmeha sala 2012 an de, bi hêz û coş tîrêjên ronahiyê li ezmanê Kobanê ya berxwedêr belav kirin. Kîn û hesreta salan bûne volkaneke ji pêt û agir. Li ser meqamê mûm û çirayan ronî didan û ber bi daxweziya azadiyê ve diherikîn. Mîna bêhna gulavan difûriya û rojên reş û tarî hilweşandin.

Bi bîr û bawerî bû koka resen ya miletperwerî û tîrêja hêviyê di sedsaliya 21ê de deriyên hesin û zingarî şkandin. Bi hêz û saya berxwedana zindana di sala 1982yan de û pêngava 15ê tebaxê di sala 1984 an de ji bo nirxên mirovayiyê bûye çiraya hêviyên paşrojê. Rê û rêbaz, dergehên azadî û demokrasiyê û projeya biratiya gelan xemiland. Mîna bajarê Stalîngirada duduyan hat binavkirin û deng veda.

Ev şoreş bi wateya xwe ya rastî bû xwîna rehên tevayiya kesayet û saziyên civaka demokratîk û di binê sîwaneke zelal û aştiyane de kom kirin. Jinê bandoreke mezin bi têkoşîneke bêhempa û bi giyanê şoreşgerî, bi rêvebirî û cangorî xwe kir stûneke dîrokî. Ji bo tevayiya jinên cîhanê bûye nimûneyeke berbiçav. Ji ber wê ev şoreş bi navê şoreşa jinê hat mohrkirin. Heta ku projeya neteweya demokratîk pêk were, ji destpêkê ve bi rê û rêbazên biratiya gelan li bakur rojhilatê sûriyê hat ragihandin. Bi tevayiya pêkhateyên xwe yên Ereb, Kurd, Suryan, Tirkmen û…hwd, bû şoreşa neteweya demokratîk û qelenekî pir giran hat dayîn. Çima em dibêjin şoreşa jinê? Lewra cara yekê di dîrokê de jin pêşengiya şoreşê dike. Belê, jin bû kok û bingehê azadiyê û li dijî nêremejîyû ku ji hezarê salan ve desthilatdarî dikir. Herwiha ji bo azadî û wekhevîyê dengê xwe gihand tevayiya jinên cîhanê. Bêguman cihê şanazî û serbilindiyê ye. Lewra cara yekê ye li Rojhilata Navî û cihanê jin barekî wiha dide ser milê xwe. Ji ber wê xwedîderketina li vê xebata nirxdar ji tevayiya azadîxwaz û mirovperweran re erkekî pîroz e.

Dema navê Kobaniyê tê bîra mirovan helbet berxwedana dîrokî ya leheng û qehremanên demê dibe tabloyeke berxwedanê li ber çav, dil û mejî.

Yek ji encamên vê şoreşê ragihandina Rêveberiya Xweser ya Demokratîk bû. Ku tevayiya pêkhateyan bi awayekî rêxistinkirî bi rê ve dibe. Lê dijmin û çeteyên wan, li hemberî şoreş û Rêvebiriya Xweser bi dijwarî şer kirin û bi tevayiya hovîtiya xwe êrîşî Kobanê kirin. Lê hêzên rûmetê (YPG-YPJ) bi vîn û baweriya xwe bersiveke dîrokî dan. Ne Kobanê tenê cîhan tev ji DAIŞa terorîst rizgar kirin. Mixabin hê jî pir dewletên ku behsa demokrasiyê û mafê mirovan dikin bêdeng in.

Di van mercan de pir kar û xebateke nirxdar û hatin kirin. Ev rêveberî bi saya şoreşa rojavayê Kurdistanê hat ragihandin û bû sîwaneke civakî. Herwiha di qada aborî, diplomasî, rêxistin, perwerde, leşkerî, olî, dadî…hwd. de bandoreke mezin kir.

Belê ev rêveberî bû jiyana giyan û dilê civakê. Mîna romaneke peyvzêrîn û her kesê azadîhez û mirovperwer bi coş, mereq û serbilindî dixwîne.

Ev şoreşê ket sala 9an û rojbiroj pêş ve diçe. Profesorê mezin Noam Çomskî got, ev şoreş perco ye–mûcîze ye. Ev jî bi saya şervanên rûmeta demê pêk hat ku jin di vê şoreşê de bû parêzvan û pêşeng. Ji ber wê parastina vê şoreşê erkeke mezin û lezgîne. Heta rûpelên dîroka mezin jî erkê xwe pêk bîne, divê tevayiya saziyên civaka sivîl û mirovayiyê vê şoreşê biparêzin. Di heman demê de divê her qad û kolanên jiyanê bibin xwediyên vê şoreşê. Li gorî parastina vê şoreşê xwe bi rêxistin bikin û tev bigerin.

Hingê wê dijmin têk biçe. Li ser vî bingehî wê bibe koka çareseriyê ji bo sûriyeke demokratîk û wê rengê hişmendiya seranserê Rojhilata Navî were guhertin. Bi giyanê şoreşa 19’ê Tîrmehê wê xelkên me Kurd, Ereb, Suryan…hwd. dagîrkeriyê têk bibin û serkeftinên dîrokî misoger bikin. Bîranîna şoreşa 19’ê Tîrmehê tê wateya bîranîna parastina nirxên mirovayiyê.

Posta çûyî

Koçberên li Şehba di berxwedanê de biisrar in

Posta tê

Rêveberiya Sotemeniyê ya Tebqa para yekê ya mozotê belav kir