Navenda nûçeya -Qamişlo
Piştî şoreşa 19`ê Tîrmehê çarenûsa xelkê Rojava hat nivîsîn. Endamên Kongreya Star yên bajarê Qamişlo dibêjin; ji bo parastin û pêşxistina destkeftiyên şoreşa Rojava emê berxwedana xwe xurttir bikin.
Bi berxwedan û têkoşîna gel, bi taybetî ya jinan, xelkê rojavayê Kurdistanê paşroja gelê Kurd, nivîsîn. Şoreşa Rojava bû çirûska ronîkirina riya gelên bindest, bi taybetî bû roniya riya azadiya jinê. Lewra bi fikir û felsefeya Rêberê Gelê Kurd Abdullah Ocalan, têkoşîna jinê heta asteke jor pêş keft. Berî şoreşê, ji ber siyaseta desthiladaran, di civakê de rola jinan hatibû tinekirin. Lê di şoreşa Rojava de, bi saya tevgera demokratîk, jin bû xwedîrol û bi têkoşîna azadiyê xwe di her qada jiyanê de bi cih kir. Ji bo wê dibêjin; şoreşa Rojava, şoreşa jinê ye.
‘Fikir û felsefeya Rêbertiyê ji bo azdiya tevayiya jinan e’
Rêvebera Kongreya Star ya bajarê Qamişlo Rodîn Îsa, li ser şoreşa 19`ê Tîrmehê nirxandin kir û got, şoreşa 19`ê Tîrmehê jiyaneke nû ava kir û axaftina xwe wiha domand: “Şoreşa Rojava vejîn e, lewra çarenûsa gelê herêmê bi jiyaneke wekhev hat nivîsîn. Bi berxwedan û lehngiya şervanan, şoreşê mohra xwe li dîrokê xist. Niha jî ya herî girîng û pêwîst ew e ku, gelê me ji bo misogeriya destkeftiyên şoreşê û xwedîderketina li xwîna şehîdan, li ber xwe bide. Bi taybetî jin, lewra bi pêşengiya jinê şoreş hat destpêkirin. ”
Rodîn Îsa diyar kir ku tevayiya jinên cîhanê azadiya xwe, di fikir û felsefeya Rêbertiyê de dibînin û axftina xwe wiha bi dawî kir: “Bi saya fikirê Rêberê xwe em gihîştine vê astê. Rêber APO ne ji bo jinên kurd tenê, ji bo azadiya jinên bindest tevan kar û xebat kir. Lewra pêşketin û hêzgirtina jinan tev bi saya Rêbertiyê ye. Ji bo wê her tim banga me ji jina re ew e ku, li keda Rêber Apo xwedî derkevin. Herwiha ji bo pêkanîna xewn û xeyalên şehîdan jî, divê em têkoşîna xwe pêş bixin û Rêberê xwe ji zindana faşistan rizgar bikin.”
`Jinên li ser felsefeya Rêber Apo xwe bi rêxistin kirîn, îro pêşeng in`
Li ser heman mijarê endama Rêveberiya Kongreya Star Xaliya Necar jî wiha axivî: “Wek tê zanîn çirûska şoreşa Rojava ji Kobanê dest pê kir. Wek Yekîtiya Star jî ku ji 2005`an ve xwedîbingeh e, bi felsefeya tevgera azadiyê jin li derdora şoreşê kom kirin û azad kirin. Bi felsefeya Rêber Apo, jinan cihê xwe di nava şoreşê de girtin. Jinên li ser vê felsefeyê xwe bi rêxistin kirîn, îro bûne pêşeng.”
Xaliya got, li bakur û rojhilatê Sûriyê jin di tevayiya qadên jiyanê de bûye xwediya roleke girîng û bi van gotinan berdewamî da axaftina xwe: “Em tev dizanin ka jin berî şoreşê çawa dijiya û rola wê di civakê de bi çi rengî bû. Ji bo bidestxistina mafê xwe, berî şoreşê jî jinan heta asteke baş kar û xebat dikir. Lê şoreşa 19`ê Tîrmehê, ji bo jinan bû çavkaniya pêşxistinê. Weke niha li ber çavan tê xuyakirin ka jin, bi destpêkirina şoreşê gihîştiye çi astê. Mirov dikare bêje, jin bi felsefeya Rêber APO re, vejîn.”
