Statûya Kurdan çarenûsa Rojhilata Navî ye

Dilîn EHMED-Qamişlo

Naskirina Rêveberiya Xweser ya bakur û rojhilatê Sûriyê, bûye rojeva cîhanê. Li ser mijarê Sîham Dawid got, ji ber ku projeya Rêveberiya Xweser demokratîk e, hêzên desthilatdar naxwazin statûya wê hebe.

Tevî dorpêç û şert û mercên ku Rêveberiya Xweser tê re derbas dibe, hewl dide tevayiya xizmetan ji gelê bakur û rojhilatê Sûriyê re pêşkêş bike. Ji bo xwedîderketina li kar û xebatê ya bi salan, ev demek e mijara naskirina Rêvebriya Xweser bûye rojeva cîhanê û kampanya haştagê ya #Status4NorthAndEastSyria dest pê kiriye. Fermandarê Giştê yê QSD’ê Mezlûm Ebdê jî bi daxuyaniyekê banga tevlêbûna kampanyayê kir. Herwiha gelek kesayetên siyasî yên navdar û hinek berpirsên hikumetên Ewropa jî piştgirî dan kampanyayê û di demeke kurt de li ser medya civakî bi sedhezaran mirov li seranserê cîhanê tevlî bûn.

`Bingehê Rêveberiya Xweser avakirina jiyaneke hevbeş e`

Têkildarî mijarê Sekretêra Giştî ya Partiya Sûriya Paşrojê Sîham Dawid di serî de malbatên şehîdan salvegera 19`ê Tîrmehê, li tevayiya gelê aşîtîxwaz, pîroz kir. Sîham Dawid diyar kir ku, avakirina Rêveberiya Xweser berhemek ji berhemên şoreşa Rojava ye û wiha berdewamî da gotinên xwe: “Ji bo avakirina jiyaneke birûmet û azad, Rêveberiya Xweser hat avakirin. Ev rêveberî ne ji bo neteweke tenê, ji bo tevayiya gelên bindest, dest bi kar û xebatê kir. Ji destpêkê ve Rêveberiya Xweser û Meclisa Sûriya Demokratîk (MSD) ji bo çareserkirina pirsgirêkên Sûriyê, banga lidarxistina diyalogên aşîtiyê dikin. Heta niha jî dibêjin; çareserkirina pirsgirêkan bi diyaloga ye, ne bi şer e.”

Sîham Dawid diyar kir ku bi avakirina dewlet-neteweyê re bi taybetî li Rojhilata Navî, hêzên desthiladar yên ku dixwestin desthiladariya xwe li seranserê cîhanê bidin meşandin, Kurdistan kirin çar parçe.

Sîham axaftina xwe wiha domand: “Ji bo ku li Rojhilata Navî pirsgirêk her tim zindî bin, hêzên serdest ji bo berjewendiyên xwe, Kurdistan xistin binê dagîrkeriya çar dewletan. Ev hêz her tim Kurd, Ereb, Suryan û Asûran ku bi salan e bi hev re dijîn, li dijî hev nîşan didin. Armanca wan ew e ku, rê ji xwe re vekin û maf ji xwe re bibînin ku dest li her pirsgirka Rojhilata Navî werdin.”

`Divê em li rêveberiya xwe xwedî derkevin`

Sîham Dawid bal kişand ser girîngiya naskirina Rêveberiya Xweser û wiha dewamî da axftina xwe: “Sîstema Rêveberiya Xweser tersê sîstema hêzên serdest e, ti kes nikare vê inkar bike. Gelên bi salan ji aliyê hêzên serdest ve hatîn bindestkirin, îro bi saya sîstema rêveberiyê bi zimanê xwe çand û hunera xwe li ser xaka xwe azad dijîn. Jixwe Rêveberiya Xweser li ser vî bingehî hat avakirin, ku li herêmê jiyaneke hevbeş ava bike. Ji ber wê pêwîst e di demeke kurt de Rêveberiya Xweser were naskirin.”

Sekretêra Giştî ya Partiya Sûriya Paşrojê Sîham Dawid bi van gotinan axaftina xwe bi dawî kir: “Ji ber ku projeya Rêveberiya Xweser projeyeke demokratîk e, hêzên navdewletî yên serdest ji xwe re xeter dibînin. Lê gelên herêmê ev rêveberî hilbijartine û hembêz kirine. Ev rastiyek e û li ber çavê teyayiya cîhanê tê xuyakirin. Lê dijmin ji bo ku vê rêveberiyê reş bike û ji gel re bêje nikare pirsgirêkên we çareser bike, şerê taybet dide meşandin. Li hemberî vê rewşê divê gelê me hişyar be. Divê gelê me baş bizane ku tevî derfetên kêm û dorpêçkirinê, rêveberî her tim hewl dide ku pêwîstiyên wan bi cî bîne. Herwiha ji bo naskirina Rêveberiya Xweser divê gelê me her tim li ser piyan be. Çimkî eger em li destkeftiyên şoreşa xwe û li rêveberiya xwe xwedî dernekevin, ti kes lê xwedî dernakeve.”