Zana Roj/ Şehba
Ji bo destekdayîna dayîkên xebatkar di aliyê malbat û xebatê de, desteya Jin ya Kantona Efrîn û Şehbayê pirojeya Dayîngehan dan destpêkirin. Berdevka Desteya Jin Arîn Bekir da zanîn ku li gorî pêwîstiyan me 3 dayîngeh ji dayîkên xebatkar re vekirin.
Xwedîkirin û mezin kirina zarokan barekî girane. Divê dem û wextên têrker ji bo mezinkirina zarokekî bê dayîn. Bê guman ev yek destek dayîn û alîkariyeke gelek mezin dixwaze. Mezinkirin û xwedîkirina zarokan erkekî pîroz e û ev erka pîroz li ser milê jina pîroz e, hele hele ev yek ji aliyê jina xebatkar ve bê kirin. Li ser vê bingehê li herêma Şehbayê ya ku piraniya wê koçberên Efrînê lê dimînin. Desteya Jin ya Kantona Efrîn û Şehbayê dayînghên taybet ji bo dayîkên karker vekirin. Bi taybet di piraniya sazî û derstgehên li herêmê rêjeya jin û dayîkan zêdetir e. Li gorî vê hat dîtin ku dayîngeh bên vekirin. Da ku bibe cihî alîkarî û destekdayînê, him ji bo zarokan him jî ji bo jinê.
Têkildarî pirojeya vekirina dayîngehan li herêma Şehabyê. Berdevka Desteya Jin a Kantona Efrîn û Şehbayê Arîn Bekir ji rojnameya me re axivî.
`Li gorî daxwaz û pêwîstiyê dayîngeh hatin vekirin`
Arîn di axaftina xwe de diyar kir ku ji ber hejmara zêde ji dayîkên xebatkar ev piroje hate destpêkirin û wiha got: “Jinên Şehba û Efrînê di tavahî sazî û destgehên li herêmê de muhra hebûna xwe diyar kirine û ev yek cihê kêfxweşî û şanaziyê ye ku em dibînin jinên ku bi şoreşê re mane û bûne dayîk rûxmî her tiştî îro hebûna xwe diyarker kirine. Di heman demê de diviyabû em bi dayîkên kedkar re bibin alîkar da ku em hinek ji zehmetiyên wê yên kar û xwedîkirina zarokan de bibin destek. Lewra li gorî pêwîstî û daxwazan hate dîtin ku pirojeya avakirina dayîngehan pêwîste ku were pêşxistin”.
Li herêma Şehbayê 3 dayîngeh hatine vekirin
Arîn di derbarê vekirina dayîngehan de wiha axivî:”Bê guman rewşa herêma Şehbayê di aliyê siyasî û cografîk de xwedî taybetmendiyeke cuda ye. Her wiha rewşa koçberiyê û zehmetiyên ku malbat pê re rû bi rû dimînin, pirî caran guncav nayê dîtin ku zarok li gel hin kesên din bê hiştin. Weke gavên yekemîn 2 dayîngeh hatin vekirin li kampa Serdem û Kampa Berxwedan. Di sala 2024 an jî dayîngehek li bajarokê Til Rifetê jî hate vekirin. Di her dayîngehekê de 2 jinên ku bi zarokan re mijûl dibin hene, û her di dayîngehek de ji 25 heyanî 30 zarokî hene. Dayîngeh ji bo avakirina atmosferekî guncav ji zarokan re hatiye avakirin, hemû alavên perwerdê, lîstin û çalakiyên din tê de hene. Her zarokek li gorî temenê wî/wê pê re mijûlî çêdibe û pêwîstiyên wî/wê tên bicihkirin. Di heman demê de civînên malbatî jî di derbarê zarok û dayîngehê de hatin çêkirin”.
Wê pirojeya berferehkirina dayîngehan werin pêşxistin
Arîn di axaftina xwe de diyarkir ku wê dayêngehan ferehtir bikin û wiha domand: “Piştî vekirina dayîngehan li herêmê qebûlkirinek mezin ji aliyê malbatan ve hate pêşxisti. Di dema niha de derfetên ku hejmara dayîngehan em zêdetir bikin nîne, ew yek jî me dabû xuyakirin ku herêma Şehbayê xwedî taybetmendiyên cuda ye. Ji lewra em li ser pirojeya berfirehkirina dayîngehan dixebitin. Dayîngeha Serdem û Berxwedan wê di hemû milan de bê berfirehkirin. Ev yek jî ji ber hejmara zarokên ku tê de tên tomar kirin zêdetir dibe”.
Arîn bi van gotinan axaftina xwe bi dawî kir: “Armanca me ya sereke avakirina haweyekî guncav û bi ewle ji bo zarokan re ye. Her wiha emê bi dayîkên xebatkar re bibin destek da ku rastî pirisgirêkan neyên û dema derbasî xebat dibin rihetiyek bê avakirin”.