Sekreterê NATO diyar kir ku wê hêzên xwe yên li Iraqê zêdetir bikin. Komisyona Ewleyî û Parastinê ya Parlementoya Iraqê jî diyar kir ku qebûl nakin yek leşkerê din yê biyanî derbasî Iraqê bibe.
Sekreterê Giştî yê NATO Jens Stoltenberg diyar kir ku wê di çarçoveya perwerdekirin û bihêzkirina leşkerên Iraqê de, jimara hêzên xwe yên li Iraqê ji 400 leşkerî bigihînin 4 hezarî.
Stoltenberg îşaret bi wê yekê jî kir ku wê rêzê ji serweriya Iraqê re bigirin û hemû karên xwe bi hemahengiya Hikûmeta Iraqê bikin.
Li ser vê daxuyaniya Sekreterê NATO, endamê Komisyona Ewleyî û Parastinê ya Parlementoya Iraqê Bedir Ziyadî li ser navê komisyonê daxuyaniyek da çapemeniyê.
Ziyadî diyar kir wek Komisyona Ewleyî û Parastinê, pêwîstiya Iraqê bi hêza zêdetir ya biyanî nabînin. Ji bo wê qebûl nakin NATO hêza xwe li Iraqê zêdetir bike.
Bedir Ziyadî herwiha got, eger her hêzek bê hemahengiya tam ya li gel hikûmeta Iraqê hêza xwe li Iraqê zêde bike, wek komisyon wê derbarê serokwezîr de lêpirsînê bikin.
ANHA
