Yekem kovara wêneromanî ya zarokan a kurdî GOG derket. Kovar bi zaravayê kurmancî û kirmanckî bi awayekî dîjîtal dest bi weşana xwe kiriye û ji bo zarokên temenê wan di navbera 7-14 salan de ye.
Yekem kovara wêneromanî ya zarokan a kurdî GOG, bi awayekî dîjîtal dest bi weşana xwe kir. Kovar bi zaravayê kurmancî û kirmanckî (zazakî) dest bi weşana xwe kir. GOG, navê xwe ji lîstikeke zarokan a berê girtiye û xwedî naverokeke dewlemend e.
Di GOGê de kowboyê navdar Red Kît, çermsorê biçûk Yakarî, Thorgalê ku li nav cîhana vîkîngiyan ji bo malbata xwe biparêze ji bêgavî şer dike û her wiha çîroka Milo heye.
Xêzkar Dogan Guzel bi karakterê xwe yê “Qirix”, Ender Ozkahraman bi “Çîrokên Wê Derê”, Îmam Cîcî bi zîncîreya “Ev Kî Ye?” di GOG’ê de xêz kirine û Evdal Can jî çîroka Şahmaranê xêz kiriye. Her wiha di nav karakterên xwînşîrîn ên GOG’ê de Porsor jî heye.
Di hejmara ewil a GOG’ê de hunermendê navdar ê îsraîlî Asaf Hanuka jî bi çîrokek xwe piştgiriya kovarê kiriye. Ji xeynî vê di GOG’ê de çîrokên mirovên zanyar û hunermendan, dahurandina karakterên wêneromanî û nûçeyên zanist û hunerê jî hene.
Gerînendeyê Weşana Giştî yê GOG’ê Îmam Cîcî, anî ziman ku bi GOG’ê xwestine ji bo zarokên ku ji perwerdehiya zimanê zikmakî bêpar in alternatîfekê biafirînin û di heman demê de ji bo nivîskar û xêzkarên kurd jî platfromeke serbixwe berpêş bikin.
Îmam, diyar kir ku pêşî bi awayekî dîjîtal dest bi weşanê kirine û piştî demekê dê dest bi weşana matbû jî bikin. Her wiha Cîcî da zanîn ku dê albumên wêneromanî yên hunermendên xwecihî û biyanî jî biweşînin.
GOG, 48 rûpel e û li ser navnîşana www.gog-weneroman.com tê peydakirin.