Sara Şêx Hesen
Zarokên ku bi wêneyên xwe tevlî pêşengeha ku ji aliye navenda Çand û Hunerê ve hat li darxistin bûne, wiha dibêjin: “Xeyalên xwe bi riya wênexêzkirinê em derdixînin holê. Hunera me li hember dagirkeran şoreşa herî mezin e.”
Bi boneya salvegera sêyemîn êrîşên li ser Efrînê, navenda Çand û Hûnerê ya Cemîl Horo pêşengeheke wênesaziyê ya zarokan bi dirûşma “Hunera zarokan şoreşa herî mezin e ji bo azadiya Efrînê û tunekirina dagirkeran”vekirin. Di pêşengehê de nêzî 50 zarok bi wêne û tabloyên xwe tevlî vê pêşengehê bûne. Bi gîştî nêzî 200 tabloyên ku bi destên zarokan hatiye xêzkirina hatine daliqandin. Pêşengeh li navenda Çand û Hunerê ya Cemîl Horo li taxa Eşrefiyê ya Helebê hate çêkirin. Ev pêşengeh dê rojekê dewam bike. Têkildarî mijarên ku zarok tevlî vê pêşengehê bûne nêrînên xwe bi me re parve kirin.
“EM XEYALÊN XWE BI RIYA WÊNEXÊZKIRINÊ BI LÊV DIKIN”
Zaroka bi navê Kafa Dasekilî li ser vekirina vê pêşengehê nêrînên xwe anî ziman û ev tişt got: “Ez gelek ji xêzkirina wêneyan hez dikim. Di serî de em spasiya çand û hunerê dikin ku ev derfet dane me, da ku em wêneyên xwe di hundir vê pêşengehê de pêşkêş bikin. Gelek wêneyên min di vê pêşengehê de hene yek jê min wêneyê Barîn Kobanê xêz kiriye, ji ber ez gelek bi şehadeta wê bandor bûm. Her wiha wêneyek li ser kalekî temen mezin min xêz kiriye, ji ber kesên temen mezin dîrokên me ne. Di heman demê de ez di wêneyên xwe de kar û xebatê jinan didim pêş. Ez hemû tabloyên xwe bi kevirê komirê xêz dikim, ji ber zêdetir wateya wê derdixe pêş. Em xeyalên xwe bi riya wênexêzkirinê derdixin holê.”
“BI RIYA WÊNEYAN EZ BÊRIKIRINA XWE YA EFRÎNÊ RE DERDIXIM HOLÊ”
Zaroka bi navê Fatme Oso li ser Kela Semaan ya Efrînê wêneyê xwe xêz kiriye û beşdarî pêşengehê kiriye, li ser beşdarbûna xwe ji vê pêşengehê re wiha dibêjê: “Piştî ku dewleta tirk Efrîn dagir kir em hatin Helebê û em li vir bi cih bûn. Li Helebê min dîsa xebatê xwe yê xêzkirina wêneyan domand û nehişt ku koçberî bandorê li ser min bike. Bi riya wêneyan ez hezkirin û bêrikirina xwe ji Efrînê re derdixim holê. Efrîn di bîra me de ye em ji bîr nakin, her kêliyên wê di bîra me de maye. Min Kela Semaan ya Efrînê xêz kiriye, gelek kesên hatine vê pêşengehê wêneyê min ecibandin. Ji ber ev kela dîrokî cihekî wê yê taybet di dilê her mirovê ji Efrînê heye.”
“ZAROK PÊŞEROJA CIVAKÊ NE”
Mamosteya wênesaziyê Biharîn Sîno bal kişand li ser armanca wan ji vekirina vê pêşengehê û wiha gotinên xwe anî ziman “Huner şoreşa herî mezin e li hember dagirkeran, dema êrîş li ser Efrînê pêk hat ne tenê dixwestin ku erdê me dagir bikin, êrîşa wan di heman demê de li ser çand, hûner, dîroka me bû. Hemû şagirtên wêneyan xêz dikin bi tabloyên xwe hatin tevlî vê pêşengehê bûn, ev şagirt jî li navenda çand û Hunerê ya Cemîl Horo bi awayekî akademîk hatine perwerdekirin. Armanca me ya vê pêşengehê ew e ku zarok asta xwe ya fikirî nas bikin, her wiha çand û dîroka xwe baş binasin. Serkeftin ji hemû şagirtên me re.”