Nûrî Mehmûd diyar kir ku hin aliyên girêdayî daîreyên şerê taybet mijara zarokan bi kar tînin da ku nirx û prensîbên şoreşê û sîstema demokratîk ba bakur û rojhilatê Sûriyê piçûk bikin. Nûrî Mehmûd got; em li gorî protokolên navneteweyî tev digerin û zarokên in 18an re tevlî hêzên xwe nakin.
Berdevkê Fermî yê Yekîneyên Parastina Gel (YPG) Nûrî Mehmûd diyar kir ku gotegotên ku hin alî belav dikin û dibêjin QSD zarokan dike leşker derew in û got; em li gorî protokolên me bi NY re imze kirine tev dikgerin.
Nûrî Mehmûd ji ANHA re ku axivî, diyar kir ku şoreşa rojavayê Kurdistanê û bakur û rojhilatê Sûriyê li ser asta herêmê û cîhanê gihîştiye pêvajoyeke mezin û di têkoşîna şoreşgerî ya mirovî li ser asta cîhanê de pêşeng e. Ji ber wê li dijî welatiyên Rojava, bakur û rojhilatê Sûriyê ji navendên şerê taybet ve hemleyên reşkirinê tên kirin.
‘LI DIJÎ NIRXÊN ŞOREŞÊ PÊNGAVÊN REŞKIRINÊ HENE’
Mehmûd da xuyakirin ku navendên şerê taybet di demên dawî de giranî dane mijara zarokan û wiha got: “Armanc ji van pêngavan, reşkirina têkoşîna şoreşgerî û derkirina saziyên Rojava û bakur û rojhilatê Sûriyê ye.”
Mehmûd derbarê mijara zarokan de wiha axivî: “Zarok paşroja civakê û herêmê ne. Nabe ku li gorî mezheb, netewe, nasname yan çandê werin hikumkirin. Ji ber wê nabe ti kesî nêzî zarokên bin 18an re bibe. Herêmên rojavayê Kurdistanê û bakur û rojhilatê Sûriyê ji vî bingehî ve li zarokan dinêre, ku li gorî çand û nirxên civaka exlaqî tên perwerdekirin û avakirin.”
QSD’ê Tîrmeha 2019’an bi nûnerê taybet yê sekretêrê giştî yê NY yê kar û barê zarokan û şerê çekdar peymaneke hevbeş ji bo parastina zarokan yên li herêmên Rêveberiya Xweser û alîkariya wan imze kir.
