Ebdukerîm Siko got, “Gelê Kurd kirinên PDK`ê qebûl nake û diyar kir ku dîrok wê binivîse ku hêzên vê partiyê êrişî gerîlayên ku li hemberî dewleta tirkî ya dagîrker li ber xwe didin, kirine. Siko girîngiya yekîtiya kurdî destnîşan kir.
Sekreterê Partiya Demokrat ya Kurdistanê ya li Sûriyê Ebdulkerîm Siko êrişa hêzên Partiya Demokrat ya Kurdistanê (PDK) ya li dijî du erebeyên Hêzên Parastina Gel (HPG) ku di encamê de 3 şervan birîndar bûn û rewşa 2 ji wan giran e, şermezar kir.
Siko diyar kir ku HPG li hemberî dewleta tirkî ya dagîrker disekine, PDK jî HPG`ê asteng dike û ev yek bi “Şaştiyeke mezin” bi nav kir.
Siko êrişa PDK`ê bi “Sûceke mezin” ku wê di dîrokê de were nivîsandin, wesifand û got, “Gelê Kurd bi gelemperî van kirinên PDK`ê red dike.”
Siko di dewama axaftina xwe de diyar kir ku Partiya Karkerên Kurdistanê (PKK) êrişî hêzekê yan jî partiyekê yan jî tevgerekê nekiriye, berovajî wê ji bo gelê Kurd û doza wî têdikoşe. Herwiha diyar kir ku mafê vê partiyê ye ku li her herêmeke ji Kurdistanê têbikoşe.
Sekreterê Partiya Demokrat ya Kurdistanê li Sûriyê, bal kişand ser hewldanên yekîtiya kurdî û çareserkirina nakokiyên girêdayî komkirinên PDK`ê hêzên xwe li herêmên Parastina Medyayê û êrişên li dijî hêzên gerîla û got, “Kongreya Neteweyî ya Kurdistanê niha hewl dide çareseriyekê ji vê nakokiyê re bibîne. Divê hêzên kurdî desteka vê hewldanê bikin. Di vê pêvajoyê de divê ji nakokiyan dûr bikevin û hewl bidin yekitî pêk were.”