Artêşa tirkî ya dagîrker û çeteyên wê komkirina hêzên xwe tevî çekên giran, li ser dirêjayiya eniyên nêzî riya di navbera navçeya Til Temirê û Zirganê de yên Kantona Hesekê didomînin.
Tevgera artêşa tirkî û çeteyên wê metirsiyên êrişeke nû li dijî herêmên bakur û rojhilatê Sûriyê çêdike. Nexasim tevgerên wê yên dawî yên hemwextî êrişên wê yên dijwar li dijî Eyn Îsa. Ev tevger û êriş li gel bêdengiya garantorên lihevkirina agirbestê Rûsya û Emerîka pêk tên.
Li gorî dîmenên ku hatine kişandin, tevgerên çeteyan herî zêde li gundê Til Minax û Um El-Işbe li gundewarê Zirganê ne yên ku dewleta tirkî ya dagîrker dagîr kirine. Ji dîmenan tevgerên çeteyan, tevgera erebeyên leşkerî û xurtkirina baregehan li gundê Rîhaniyê li gundewarê Til Temir diyar dibin.
Li gorî agahiyên ku hatine bidestxistin, bi tevgerên çeteyan re û piştî hedefgirtina erebeyên sivîlan û sahrîcên avê yên ku şaredariya Til Temir ji gundên ku av nagihêjiyê re şandine, tevgera sîvîlan li ser riya di navbera navçeya Til Temir û Zirganê de kêm bûye.