SOHR’ê ragihand ku ji destpêka vê mehê ve di şerê li çolistana Sûriyê de ser 100î re ji çeteyên DAIŞ û hêzên hikumeta Şamê hatine kuştin.
Navenda Çavdêriyê ya Mafên Mirovan ya Sûriyê (SOHR) diyar kir ku ji destpêka meha Kanûnê ve, 64 endamên hêzên hikumeta Şamê û yên girêdayî wê di kemîn, teqîn û şerên li çolistana Sûriyê de û 39 çeteyên DAIŞ’ê di bombebaran, topbaran û şeran de hatine kuştin. Navendê diyar kir ku ihtîmal heye ku jimara kuştiyên her du aliyan zêde bibe, çimkî bi dehan birîndar hene ku rewşa wan giran e. Herwiha SOHR`ê bîr xist ku endamekî Hizbullahê di heman demê de hatiye kuştin.
SOHR’ê da zanîn ku operasyonên leşkerî yên li çolistana Sûriyê di sêgoşeya Heleb, Hema û Reqayê de dewam dikin û bi asteke kêmtir li gundewarê Reqa, Hims û Dêrezorê didomin.
SOHR`ê daneyên windayiyan yên di navbera 24`ê Adara 2019`an û heta îro de eşkere kirin. Dane wiha ne: Di êriş, teqîn û kemînên li çolistana Dêrezor, Reqa, Hims û Siweydayê de hezar û 84 endamên hêzên hikumeta Şamê û komên alîgirên wê yên sûrî û ji nasnameyên biyanî, hatine kuştin. Di heman dema êrişan de, 601 çeteyên DAIŞ`ê di topbaranê de hatine kuştin.
