Dayîkên şehîdan êrişên PDK’ê yên ser gerîla şermezar kirin û gotin, ev êriş xizmeta dewleta tirkî ya dagîrker dike.
Bi dehan şêniyên navçeya Dêrik, Girkê Legê, Çilaxa û Til Koçerê li deriyê Sêmalka yê sînor êrişên çekdarên PDK’ê yên ser gerîla li herêma Amêdiyê ya Başûrê Kurdistanê şermezar kirin.
Dayîkên şehîdan yên beşdarî çalakiya protestoyê bûyîn gotin, ev kiryar xizmeta siyaseta dewleta tirkî ya dagîrker dike.
Dayîka şehîd Hevrîn û Zozan Xelef, Sûad Mistefa anî ziman ku ew beşdarî çalakiyê bûne da ku peyamekê bidin PDK’ê ku “Kurdistan nayê parçkirin, dagîrker û mêtîgeran parçe kirin. Ji ber vê yekê divê hûn bi pey planên dewleta tirkî ya dagîrker nekevin.”
Dayîka şehîd Rojîn Dara, Zelfa Bidûr kiryarên PDK’ê şermezar kirin û wiha got: “Mîmarê vê planê dewleta tirkî ya dagîrker e. Divê hikumet û rêveberiya başûrê Kurdistanê ji van planên ku xizmeta tu parçeyên Kurdistanê nakin, hişyar bin. Êrişa li ser parçeyekî Kurdistanê, parçeyên din jî lawaz dikin, dijmin jî vê yekê dixwaze.”
Zelfa Bidûr girîngiya yekîtiya kurdî destnîşan kir û wiha domand: “Divê rêz û gotina kurdî bibe yek, şerê navxweyî wê ji aliyan tevan re wêranê bîne. Em piştgiriyê didin hêzên kurdistanî çi HPG û çi pêşmerge ku dema parastina berjewendiyên gelê Kurd û destekftiyên ku bi xwîna ciwanan hatine qezenckirin, dikin.”
