QSD: Me ti caran êrişî pêşmergeyan nekiriye

QSD`ê diyar kir ku gotnên ku dibêjin hêzên wan êrişî hêzên PDK`ê kirine, derew in.
Fermandariya Giştî ya Hêzên Sûriya Demokratî (QSD) daxuyaniyek ji raya giştî re parve kir û tê de bûyera şeva 16`ê Kanûnê li nêzî herêma Sihêla ya di navbera başûrê Kurdistanê û Rojava de qewimî, eşkere kir.
Di daxuyaniya QSD`ê de wiha hat diyarkirin:
“Hêzên me êrişî pêşmergeyan nekirine, em her tim rêzê ji serweriya Herêma Kurdistanê re digirin.
Di salên piştî destpêkirina operasyonên têkoşîna li dijî terora DAIŞ`ê de, li her du aliyên sînor di navbera Hêzên Sûriya Demokratîk û Hêzên Pêşmergeyan yên girêdayî hikumeta Herêma Kurdistanê de her tim makenîzmayeke koordîneya hevbeş hebû. Bi saya wê koordîneyê gelek astengî û pirsgirêkên ku li herêmên sînor derdiketin, çareser dibûn.
Bûyera şeva 16`ê Kanûnê li nêzî herêma Sihêla ya li ser sînorê di navbera Rojava û başûrê Kurdistanê de qewimî, ne êrişeke li dijî ti nuqteyên pêşmergeyan ên girêdayî hikumeta Herêma Kurdistanê bû. Daxuyaniyên ku di çapemeniyê de hatine belavkirin, mijar ji rastî û rewşa derketî mezintir kirin. Tişta qewimî kêmbûna koordîneya di navber hêzên ewlekariyê yên li her du aliyên sînor bû, weke ku hatiye gotin li dijî pêşmergeyan û nuqteyan wan ti êriş çênebûne.
Hêzên Sûriya Demokratîk her tim rêz li hemberî serweriya hikumeta Herêma Kurdistanê û hêzên wê yên leşkerî li ser xaka wê, girtiye. Piştî koordîneya ji bo agirbestê di navbera komeke gerîlayan ku erkên xwe yên piştgiriya operasyonên têkoşîna li dijî DAIŞ`ê xilas kiribû û vedigeriya baregehên xwe, ew kom ji aliyê pêşmergeyan ve hat dorpêçkirin. Li ser wê şerekî demkurt di navbera her du aliyan de derket. Wê demê hin aliyên peywendiyê yên girêdayî me destwerdan kirin da ku wî şerî bisekinîn û bi aliyê din re koordîne bikin da ku koma gerîla bi ewleyî vegere baregehên xwe.
Em Hêzên Sûriya Demokatîk di wê baweriyê de ne ku xurtkirina koordîneyê di navbera her du aliyên sînor de pêwîstî û mîsogeriya tekane ye da ku di paşrojê de têgihiştineke nebaş çênebe, ev koordîne dikeve xizmeta berjewendiyên hevpar û xebata ewleyî û aramiya sînor.”