Bi hezaran welatiyên kantona Girê Spî, bajarê Reqa û Kobanê li navçeya Eyn Îsa meşiyan. Welatiyan bang li civaka navneteweyî û Rûsya kir ku sûcên dewleta tirkî yên li dijî navçeya Eyn Îsa bidin rawestandin û sozên dayîn pêk bînin.
Welatî li Çerxeriya Şaredariyê ya navçeya Eyn Îsa kom bûn û ber bi baregeha Rûsya ya li navçeyê ve meşiyan.
Welatiyan sloganên li dijî dewleta tirkî ya dagîrker û silavkirina şehîdan û berxwedana Hêzên Sûriya Demokratîk (QSD) avêtin. Herwiha pankartên “Na ji dagîrkeriya tirkî re, erê ji bo parastina destkeftiyan”, “Em dixwazin di nava aştiyê de bijîn”, wêneyên şehîdan, alên QSD’ê, Partiya Sûriya Paşrojê û Tevgera Ciwanên Şoreşger vekirin.
Li pêşiya baregeha Rûsya, hevserokê Meclisa Kantona Girê Spî Hemîd El-Ebid axivî û diyar kir ku ji bo şermezarkirina bêdengiya navneteweyî û garantora Rûsyayê li hemberî êrişên dewleta tirkî ya dagîrker kom bûne.
El-Ebid berxwedana QSD`ê ji bo parastina navçeyê ji êrişên dewleta tirkî silav kir.
Her wiha bi navê êlên Reqayê şêx Mihemed El-Sewan axivî û diyar kir ku welatî hemû bi QSD`ê re ne. El-Sewan da zanîn ku sekna wan li navçeya Eyn Îsa nîşana hevgirtina gelên herêmê ye.
Hevserokê Meclisa Rêveber ya Herêma Firatê Mihemed Şahîn jî diyar kir ku gelên herêmê ji bo serkeftinê û rizgariya ji zordestiyê bi hezaran şehîd dane. Şahîn got, hebûna dewleta tirkî li ser axa Sûriyê ne rewa ye û gelên Sûriyê çaranûsa xwe bixwe diyar dikin.
