Koçberên ji Efrînê yên li navçeya Şêrawa gotin, “Her çend artêşa tirkî êrişên xwe yên ser Şêrawa û gundewarê Şehba zêde bike jî emê berxwedana xwe ya vegera li Efrînê bidomînin.”
Artêşa Tirkî û çeteyên wê êrişên xwe yên li dijî sîvîlên gundên navçeya Şera û Şêrawa yên kantona Efrînê û gundên kantona Şehbaa didomîne da ku wan koçber bike û nehêle careke din li warê xwe vegerin.
Hefteya derbasbûyî artêşa tirkî zêdetirî 600 topî avêtin gundê Soxanakê, derdora Aqîbê, Qinêtira, Meranêz, Şiwarxê, Şêx Îsa û Eyn Deqnê yên navçeya Şêrawa. Di encamê de ziyaneke mezin gihîşt mal û milkên sîvîlan.
Têkildarî mijarê koçberên Efrînê diyar kirin ku artêşa tirkî û topên wê nikarin vîna wan bişkînin û wê heta rizgarkirina Efrînê berxwedana xwe bidomînin.
Welatiya bi navê Roşîn Elî ya ji bajarê Efrînê û li gundê Aqîbê dimîne, got her çi qas dagîrker êriş bikin wê berxwedana me dewam bike.
Roşîn Elî diyar kir ku piştî êrişên ser bajarê Efrînê, wê û zarokên xwe berê xwe dane Şêrawa û ji sê salan ve li dibistana gundê Aqîbayê dimînin. Roşîn Elî got, dewleta tirkî dixwaze heman senaryoyê Til Rifet û Aqîbê dubare bike.
welatiyê bi navê Îbrahîm Xelîl jî got, artêşa tirkî malên sîvîlan yên li gundê Qinêtrayê topbaran dike, mizgefta gund hilweşand û şênî koçber kirin. Di nava 24 saetan de 200 top avêtin gundên Şêrawa.
Di dawiyê de Îbrahîm Xelîl bang li civaka navneteweyî û hêzên garantor yên li herêmê kir ku derbarê van êrişan de helwestekê nîşan bidin.
