Meclisa Ciwanan ya Partiya Sûriya Paşrojê bi durişma “Bi têkoşîna yekîtiya gelan ji bo Sûriyeyek azad emê teqez bi ser bikevin” roja Çarşemê kongreya xwe ya damezrîner li dar xist. Di kongreyê de berdevkê meclisê, cîgir û 20 endam hatin hilbijartin.
Di kongreyê de piştî rêzgirtinê bi navê Komîteya Amadekar Lîna El-Tahêr axivî û xebata nivîsgehên ciwanan yên 2 salên borî bi armanca belavkirina têgehên partiyê di nava çînên gel de bi taybetî ya ciwanan li gorî perspektîfên kongreyên giştî yên partiyê, bîr xistin.
Serokê partiyê Îbrahîm El-Qeftan lidarketina kongreyê li ciwanan pîroz kir û diyar kir ku kongre tovê belavkirina demokrasiyê û têgehên di nava civakê de û xwedîderketina li rêgeza siyasî ya projeya demokratîk ya li bakur û rojhilatê Sûriyê ye.
Cîgira hevserokatiya Meclisa Rêveber ya Rêveberiya Xweser ya bakur û rojhilatê Sûriyê Emîne Osê jî axivî û lidarketina kongreyê pîroz kir.
Ji fermandarên Hêzên Sûriya Demkratîk (QSD) Ebdo Reqa axivî û soz da ku wê QSD piştgiriya destkeftiyên siyasî bike.
Dayîka şehîd Hevrîn Xelef bi navê Meclisa Malbatên Şehîdan axivî û behsa rola berxwedanê û fedekariya şehîdan ji bo pêkanîna serkeftinê kir.
Di dawiya kongreyê de ciwanan, Zana Mistefa wek berdevk, Cewahêr Faris wek cîgir û 20 kes wek endamên meclisê hilbijartin. Paşê encamnameya dawî hat xwendin û tê de berdewamkirina têkoşîna siyasî heta pêkanîna armancên partiyê, avakirina Sûriyeyeke demokratîk, bidawîkirina serdemên zordestiyê û şerê di navbera gelê Sûriyê de hat piştrastkirin.
