Polîsên leşkerî yên Rûsya û leşkerên artêşa tirkî ya dagîrker Duşema borî dewriyeyeke hevbeş li gundewarê rojavayê navçeya Dirbêsiyê pêk anîn.
Dewriyeya hevbeş ya 34’an ya ji gundewarê navçeya Dirbêsiyê ya kantona Hesekê sibeha Duşemê ji gundê Şêrik yê 13 km li rojavayê Dirbêsiyê, dest pê kir.
Dewriye di gundê Dlîk, Melek Qenîtra, Qermaniyê, Til Kidîş, Xenamiyê, Kerbitliyê, Til Têra, Cidêdê, Baba Mehmûd, Til Kermê, Xasikê, Ebû Ceradê, Xerzê, Xankê û Cewheriyê re derbas bû.
Şêniyên gundên navborî redkirina xwe ji dewriyeyê re bi avêtina keviran, diyar kirin.
Dewriyeya hevbeş piştî ku wesaitên zirxî yên dewleta tirkî vegeriyan deriyê Şêrik, hêzên Rûsya jî vegeriyan bargeha xwe ya li bajarê Qamişlo.
Roja pêncşemê jî polîsên leşkerî yên Rûsya û leşkerên artêşa tirkî ya dagîrker dewriyeyeke hevbeş li ser sînorê li rojavayê Kobanê meşandin.
Li gorî agahiyan dewriyeyê ji gundê Aşme dest pê kir. Dewriye ji 4 panzêrên artêşa tirkî û 4 panzêrên Rûsya pêk dihat.
