Li herêma Firatê qedexeya giştî dest pê kir. Rêveberiya herêmê hewl dide pêşî li belavbûna zêde ya vîrûsa koronayê bigire.
Di roja yekê ya qedexeyê de ku wê heta 26’ê vê mehê dirêj bike, dikan, navendên giştî, dibistan û saziyên Rêveberiya Xweser û civaka sîvîl tev hatin girtin.
Tevî ku dikandar girêdayî qedexeyê ne, tevgera gel hê jî li kolanan heye. Herwiha bendên ewlekariyê li hundirê bajarê Kobanê heta niha nînin.
Rêveberiya Xweser ya Herêma Firatê biryara qedexeya derketina derve ya giştî li herêmê 12’ê mehê ragihandibû.
Jimara fermî ya nexweşên vîrûsa korona li Kobanê nêzî 500î bûye. Lê jimara nexweşan ji jimara fermî pirtir e. Lewre gelekan testa koronayê çênekiriye.
Gelek bijîşkan, ji nava wan Dr. Bextiyar Mideris El-Hisên û Ehmed Şahîn bang li şêniyên Kobanê kirin ku parastina şexsî bikin.
