Meclisa Jinan ya bakur û Rrojhilatê Sûriyê şaxê kantona Efrînê sûcên dewleta tirkî yên li dijî jinan şermezar kirin û banga vekirina lêpirsîneke navneteweyî ya giştî têkildarî sûcên dewleta tirkî yên li herêmên dagîrkirî yên Sûriyê kir.
Bi nêzîkbûna Roja Têkoşîna li dijî Tundiya li ser Jinan ya Cîhanê re, Meclisa Jinan ya bakur û rojhilatê Sûriyê şaxê kantona Efrînê têkildarî sûcên dewleta tirkî yên li dijî jinan li kantona Efrînê ya dagîrkirî daxuyaniyek da.
Bi dehan endamên saziyên Rêveberiya Xweser, Kongreya Star û partiyên siyasî li qada Kampa Berxwedan ya li navçeya Fafînê ya kantona Şehbayê kom bûn. Endama Meclisa Jinan Zelûx Reşîd daxuyanî xwend.
Meclisê di daxuyaniya xwe de diyar kir ku dîroka dewleta tirkî tijî qirkirin, komkujî, çewisandin, sînordarkirina azadiyan û zayendperestî ye.
Herwiha meclisê bîr xist ku dijminahiya li dijî jinan di dema desthilatdariya AKP`ê ve zêde bûye. Bi zanebûn siyaseta çewisandinê li dijî jinan dimeşîne, nexasim jinên çalakvan û parêzvanên mafên mirovan.
Meclisê wiha da zanîn: “Rojane jin li Tirkiyê ji hêla mêran ve bi hincetên nerast tên kuştin, bê ku hikumeta Tirk tedbîran bigire û rê li pêşiya vê diyardeya ku her ku diçe zêdetir dibe, bigire. Ji wê zêdetir hewl dide ji lihevkirina Stenbolê ya parastina jinan ji tundiyê vekişe. Bi hezaran jin di girtîgehên Tirkiyê de ne û rastî gelek cureyên işkence û destavêtinê tên. Gelek ji wan dest bi girêvên birçîbûnê kirin û şehîd bûn, herî dawî Ebru Tîmtîk.”
Meclisê di daxuyaniyê de diyar kir ku dewleta tirkî heman siyasetê li herêmên dagîrkirî dimeşîne, li bajarê Efrînê hovanetirîn sûc li dijî jinan pêk anîn. Ew bi riya şkandina vîna jinan dixwaze vîna civakê têk bibe. Zîhniyeta wê zîhniyeta DAIŞ`ê ya terorîst bixwe ye.
Meclisê bal kişand ser daneyên Rêxistina Mafên Mirovan ya Efrînê yên têkildarî rewşa jinan li Efrînê û ev agahî parve kir: “Li gorî rêxistinê zêdetirî hezar jinî hatine revandin, zêdetirî 67 jinî hatine kuştin û destavêtin li wan hatiye kirin. Keçên piçûk bi zorê û bi gefxwarinê bi çeteyan re hatine zewicandin. Ji ber wê em dibînin gelek malbat careke din ji Efrînê derdikevin ji ber tirs û zextên ku li dijî wan tên kirin. Hikumeta tirkî vê yekê dixwaze û ji destpêka dagîrkirinê ve hewl dide herêmê ji welatiyên resen vala bike, demografiya wê biguherîne.”
Meclisê sûcên dewleta tirkî şermezar kirin û da xuyakirin ku ew sûc digihîjin asta sûcên şer. Meclisê herwiha bang li tevahiya rêxistinên mafên mirovan, hiqûqî û jinan kir ku erkên xwe pêk bînin û komîteyên hiqûqî bişînin Efrînê da ku rastiya rewşa jinan bi giştî û di nava girtîgehan de bi taybetî bibînin.
