Şêniyên bajarê Dêrikê û navçeyên wê cenazeyên 4 şervanên Hêzên Ewlekariya Hundir û Hêzên Sûriya Demokratîk (QSD) yên li cihên cuda şehîd bûyîn li Goristana Şehîd Xebat Dêrik spartin axê.
Welatiyan cenazeyên şehîdan Sîrac Elî, Mihemed Wehîd Cebir, Mesûd Taşkin (Demhat Sêrtî), Mistefa Elî (Şiyar) ji nexweşxaneya Dêrikê girtin û bi karwanekî erebeyan ber bi Goristana Şehîd Xebat Dêrik ve ketin ser rê.
Di merasima li gotistanê de Hevserokê Meclisa Malbatên Şehîdan ya herêma Cizîrê Hesen Ubêd axivî û got: “Di şexsê her çar şehîdan de em tevahiya şehîdên azadiyê bi bîr tînin. Şehîdên ku canê xwe ji bo rizgariya gelan feda kir.”
Di merasimê de ji fermandarên Hêzên Asayîşê yên Dêrikê Zinar Hacî axivî û soza şopandina rêya şehîdan heta pêkanîna xewnên wan da.
Bi navê malbatên şehîdan, Viyan Cûdî axivî û wiha pê de çû: “Di encama hevgirina gelên Bakur û Rojhilatê Sûriyê û bi saya xwîna şehîdan a pak felsefeya demokratîk bi ser ket.”
Piştî bidawîbûna axaftinan, wesîqeyên şehadeta şehîdan ji hêla Meclisa Malbatên Şehîdan a Girkê Legê ve hatin xwendin û radestî malbatên wan hatin kirin.
Piştre girseya gel, cenazeyên her çar şehîdan di nav tilîliyên dayîkan de û berzkirina dirûşmên silavkirina berxwedana şehîdan, veşartin.
