Li navçeya Dirêkê, jimara nexweşên korona roj bi roj pirtir dibe. Şaneya Aloziyê ya Herêma Cizîrê qedexeya derketina derve ya giştî ji bo 14 rojan li navçeyê ragihand.
Şandeya Aloziyê ya Herêma Cizîrê di daxuyaniyê de bal kişand ser van xalan:
“Ji bo parastina berjewndiya giştî ya derbarê belavbûna vîrusa koronayê de û zêdebûna pêketiyan li cîhanê di nav de herêmên me û bajarê Dêrikê bi taybet, Şandeya Aloziyê ya Herêma Cizîrê vê biryarê dide:
-Qedexeya derketina derve ya giştî li navçeya Dêrikê û bajarokê wê ji bo 14 rojan hate ferzkirin. Qedexe roja 06-11-2020’an saet 6’ê sibeha dest pê dike heta 19-11-2020’an bi dawî dibe.
– Hemû dibistan, sazî, cihên îbadetê, dikanên pîşesazî, stand, xwaringeh û kilînkên taybet tên girtin.
-Dikanên zebze û madeyên xwarinê yên di nav taxên gel ji saet 6’ê sibeha heta 1’ê nîvro vekirî bin.
-Nexweşxaneyên giştî û yên taybet wê tenê pêşwaziya rewşên lezgîn bike û dermanxane li gorî lîsteyên nobetê vekirî bin.
-Ji bilî rewşên nexweşî, erebeyên madeyên xwarin, zebze, sotmenî, derman û nan ketin û derketina ji bajarê Dêrikê û gundên wê qedexe ye.
-Di bin cezayê berpirsiyariyê de qedexeya derketina derve li nav bajêr tê ferzkirin.
-Ji bilî saziyên xizmetguzariyê/ paqijî, av, kehrebe, tenduristî, komîteyên awarete ”Şaredarî” hemû sazî têne girtin.
Em bang li welatiyan dikin ku biryaran û tedibîrên xweparastinê yên lixwekirina maskan û rêgeza dûrketina civakî, bi cih bînin.”
