Bi durişma “Bi berxwedana ramyarî, emê şoreşa çandê bi ser bixin” roja Înê Yekîtiya Rewşenbîrên Herêma Cizîrê konferansa xwe ya 4. bi amadebûna 100 delegeyan li dar xist.
Konferans li hola Zanîngeha Rojava ya bajarê Qamişlo li dar ket. Endamên Tevgera Civaka Demokratîk (TEV-DEM), Yekîtiya Nivîskarên Kurd-Sûrî, Yekitiya Nivîskarên Kurdistan-Sûriyê, Hevgirtina Rewşenbîrên Rojavayê Kurdistanê û Komîteya Wêjeyî ya Rojavayê Kurdistanê tê de amade bûn.
Hevseroka TEV-DEM`ê Zelal Cîger di konferansê de axivî, bal kişand ser rola ku dikeve ser milê rewşenbîran di têkoşîna azadiyê de û got: “Reşenbîr dikarin dîrokê mayînde bikin.”
Zelal bal kişand ser rewşa siyasî û wiha dewam kir: “Her rewşenbîrek siyasetmedarek e. Rewşenbîr wekî zanyaran in, ji ber ku siyaset zanebûn e, zanista civakê ye û derxistina rastiya dîrokê ye.”
Herwiha diyar kir ku armanca kiryarên dewleta Tirk a dagirker ên li dijî Kurdan li her çar parçeyên Kurdistanê ew e ku gel negihêje azadiya xwe. Ji ber ku gelê Kurd xwedî nirxên wekheviyê û jiyana hevbeş e.
Piştre serokê Yekitiya Nivîskarên Kurdistan-Sûriyê Ebd El-Samad Mehmûd wiha axivî: “Erka ku dikeve ser milê rewşenbîran ew e ku dîroka îmhakirina gelê me tune bikin, dîroka serdema nû binivîsin.”
