Şehîdên ragihandinê Dilovan Gever, Mihemed Reşo, Seed Ehmed û Welat Erdemcî yên di “Berxwedana Rûmetê” de şehîd bûyîn, ji aliyê heval û malbata wan ve hatin bîranîn.
Endama ragihandina YPJ`ê Dilovan Gever, nûçegihanê Çira TV Mihemed Reşo, nûçegihanê ANHA Seed Ehmed, xebatkarê çapemeniya azad Welat Erdemcî ku di Berxwedana Rûmetê de şehîd bûbûn, di salvegera yekê ya şehadeta wan de ji aliyê malbat û hevalên wan ve hatin bîranîn. Merasimê bîranînê li ser gora endamê Çira Tv şehîd Mihemed Reşo ya li Gortistana Şehîd Delîl Sarûxan li bajarê Qamişlo hat lidarxistin.
Ji aliyê hevalên şehîdan ve pankarta bi nivîsa “Rojnemevanên Azadiyê Şopdarên Heqîqetê” hat kekirin.
Destpêkê rojnemevanê ANHA Ekrem Berekat axivî û da zanîn ku kesên berdevkiya civaka xwe dikin dibin hedefa dewleta tirkî ya dagîrker û wiha got: “Ji ber ku dewleta tirkî ya dagirker êrişî heqîqeta gelê kurd dike, naxwaze heqîqet, rastiya berxwedana gelê kurd li cîhanê bê ragihandin”.
Berekat diyar kir ku şehîdbûna ku di qada çapemeniyê de ya Bakur û Rojhilatê Sûriyê de çêdibe tê wateya ku dewleta Tirk a dagirker ji heqîqeta gelê kurd ditirse û got: “Ji lewra êrişî kesên ku berdevkiya vê heqîqetê dikin dike”.
Hevserokê Yekîtiya Ragihandina Azad Bengîn Seydo jî sersaxî ji malbat û hevalên şehîdan re xwest û diyar kir ku rojnamevan di her operesyonekê de qasî şervanan berxwedaniyê dikin.
Seydo wiha got: “Tevî ku ewqas civaka navneteweyî ya bêbext bêdeng bû, lê rojnamevanên Bakur û Rojhilatê Sûriyê erka gihandina dengê Serêkaniyê û Girê Spî girtin ser xwe da ku bigihînin tevahî cîhanê”.
