Li Hesekê mamoste li dijî tecrîda li ser rêber Abdullah Ocalan û êrişên dewleta Tirk meşiyan. Enwer Muslim di çalakiya de got “Ji erkê perwerdeyê ye ku asta têkoşînê mezin bike da tecrîda li ser rêber Abdullah Ocalan bi dawî bibe.”
Rêveberiya Giştî ya Dibistanan a Kantona Hesekê ji bo şermezarkirina tecrîda li ser rêber Abdullah Ocalan û êrişên dewleta Tirk ên li dijî herêmên bakur û rojhilatê Sûriyê meşek li dar xist.
Bi sedan mamoste li pêşiya Parka Apo ya li taxa Nasre ya bajêr kom bûn û dest bi meşê kirin. Di mitînga piştî meşê de hevserokê Partiya Yekîtiya Demokratîk (PYD) Enwer Muslim axivî û got, “Dewleta Tirk dixwaze herêmên din ji axa Sûriyê dagîr bike. Efrîn, Serê Kaniyê û Girê Spî mînaka herî berbiçav in.“
Muslim di nav axaftina xwe de diyar kir ku rêber Abdullah Ocalan xwedî armancên demokratîk û çandina heskirinê li Rojhilata Navî ye. Ji ber wê erkê perwerdeyê ye ku asta têkoşînê mezin bike da ku tecrîd bi dawî bibe.
Hevseroka Rêveberiya Giştî ya Dibistanan Jînda Ehmê jî got, “Armanca me piştgiriya berxwedana Hêzên Parastina Gel e. Ji destpêka şoreşa Rojava ve, dewleta Tirk êrişî herêmên me dike da ku destkefiyên ku me bi dest xistine têk bibe.”
Meş bi sloganên silavkirina rêber Abdullah Ocalan û şermezarkirina dagirkeriya Tirk bi dawî bû.
