Meclisa Malbatên Şehîdan ya Reqayê, bi durişma “Şehîdan ji bo paşrojeke ronî û pergaleke adil û wekhev ji bo gel û welatê xwe berdêlên giran dane”, konferansa xwe ya duduyan li dar xist.
Konferans bi beşdariya 350 delegeyan ji malbatên şehîdan, rêveberên meclisên Reqa û gundewarên wê, nûnerên Rêveberiya Xweser, partiyên siyasî, meclisên malbatên şehîdan ên Tebqa, Dêrezor, Kobanê, Minbicê, Cîzîrê li hola Tac a bajarê Reqayê li dar ket.
Piştî rêzgirtinê, ji bo rêvebirina konferansê endamên dîwanê hatin hilbijartin.
Axaftina destpêkê ji aliyê Hevseroka Meclisa Sîvîl a Reqayê Leyla Mistefa ve hat kirin.
Leyla Mistefa lidarxistina konferansê li malbatên şehîdan pîroz kir û wha got: “Em bi armancên xwe ve girêdayî ne heta Sûriyeke nû, Sûriyeke bi aştî û heskirin ava bikin. Em ji malbatên şehîdan re dibêjin em bi ked û fedekariya zarokên we li vir in. Em bi we serbilind in û emê xeta şehîdan bişopînin heta armacên wan pêk bînin. “
Di konferansê de bi navê Rêveberiya Jinan a Reqayê endama rêveber Meryem Îbrahîm, bi navê Meclisa Malbatên Şehîdan hevseroka Meclisa Malbatên Şehîdan Semsa Salih û bi navê Meclisa Leşkerî ya Reqayê fermandar Ebdo Reqa axivîn.
Di dawiyê de hilbijartin pêk hat. 24 endamên Meclisa Malbatên Şehîdan a Reqayê hatin hilbijartin û Remedan Remedan û Şemsa Salih ji bo rêvebirina meclisê hatin hilbijartin.
Konferansa 2. ya Meclisa Malbatên Şehîdan ya Reqa hat lidarxistin
