Jiyan Bozo
Bi salan e Rêber APO di binê tecrîdeke giran û hovane de ye. Dewleta Tirk ya dagîrker nahêle parêzer û malbata wî biçin gel. Gelo li Îmralî çi dibe? Rewşa Rêber APO çi ye û ji bo şkandina tecrîdê divê çi bê kirin?
EM NE NOKA LI KEVIR IN EM XELEKA JI AGIR IN
Têkildarê mijarê endamê Meclisa Bajarê Amûdê Hemdî Esad, ji rojnameya me re wiha axivî: “Ev 21 sal in ku Rêber Abdulah Ocalan di girtîgeha dewleta Tirk ya dagîrker de ye. Li girava Îmralî di binê tecrîdeke giran û hovane de ye. Mebesta wan tinekirina rêbertiya me û qutkirina wî ji gel e. Rêber APO afrînerê jiyana azad û birûmet e. Ti kes û ti hêz nikarin roja me tarî bikin. Bi van êrişan dixwazin vîna me bişkînin, lê em ne Kurdên berê ne, em şagirtên Rêber APO ne. Em ti carî ji wan re serî danaynin. Em ne noka li gevir in, em xeleka ji agir in li derdora rêbertiya xwe. Rêber APO dibêje “dostayiya sexte û hevaltiya kêm ez anîm vê rewşê”. Ji bo wê divê her kes xwe berpirsiyar bibîne û tekoşîna xwe xurttir bike da em azadiya Rêber APO ya fizîkî misoger bikin û faşîzmê têk bibin.”
LI KEDA RÊBER APO XWEDÎ DERKEVIN
Endama Meclisa Kongreya Star ya bajarê Amûdê Mira Zoro jî ji rojnameya me re wiha axivî: “Rêber APO hebûn û nasnameya me ye. Armanca dewleta Tirk ji tecrîdê tinekirina azadî û vîna me ye. Rêber APO ne rêberê gelê Kurd tenê ye, xwediyê projeya Neteweya demokratîk û afrînerê jiyana azad û hevbeş li Kurdistan û Rojhilat Navî tevê ye. Azadiya Rêber APO azadiya me jinan e. Em xwediyên vê şoreşê ne û deyndarên rêbertiya xwe ne. Heta em vê tecrîdê bişkînin emê li ser piyan bin û tekoşîna xwe xurttir bikin. Li ser vî bingehî banga min ji jinan tevan re heye. Rêber APO em azad, biîrade û xwedîmaf kirin. Divê em jî li keda wî xwedî derkevin, tecrîdê bişkînin û rêbertiya xwe azad bikin.”
