Salih Muslim diyar kir ku dewletan ji bo parastina cîhanê tiştek nekiriye, 1’ê Îlonê tenê sembolîk e ku heta niha aştî pêk nehatiye, yê ku aştiyê çêke paradçgmaya rêber Abdullah Ocalan e.
Girêdayî 1’ê Îlonê Roja Aştiyê ya Cîhanê, Endamê Têkiliyên Diplomatîk a PYD`ê Salih Muslim got: “Dewleta Tirk a dagîrker ti caran ji bo aştiyê nexebitiye û dixwaze her şer bike. Bi vî awayî ji bo ku cîhan wan rexne neke bi şewazên cuda şerê xwe didomîne.”
‘JI BO PARASTINA CÎHANÊ TIŞTEK NEKIRIN’
Piştî Şerê Cîhanê yê Duduyan ku bi milyonan mirov hatin kuştin û ewqas welat hatin xerabkirin, Roja Aştiyê ya Cîhanê hat ragihandin. Salih Muslim têkildarî ragihandina vê rojê got, “Ev roj hat ragihandin lê hêzên navneteweyî ji bo parastina cîhanê tiştek nekirin. Ji roja ragihandina roja aştiyê ya cîhanê heya niha şer nesekiniye. Ev roj, bû roja aştiya di navbera dewletan de. Di navbera neteweyan, welatan de wê çawa aştî pêk were, nebû bersiv. Eger ev Roja Aştiyê li ser edalet, azadî, wekhevî û mafnasiyê çêbûya wê demê wê watedar bûya.”
Muslim diyar kir ku herî zêde yê zirar ji şer dîtiye neteweya Kurd e û got, “Li herêmên me şerê veşartî, şerê taybet û şerê dewletan dibe, nesekiniye. Dewleta Tirk a dagîrker ti carî ev roja aştiyê nepejirandiye. Dagîrkirina Qibrisê, dagîrkirina Başûrê Kurdistanê, şerê li ser Rojavayê Kurdistanê û şerê ku di hundirê xwe de kiriye ewqas bajar talan kirin, diyar dikin ku dewleta Tirk ti caran rêz ji aştiya cîhanê re negirtiye.”
Derbarê daxuyanî û erkên CPT de Salih Muslim wiha got: “Karê CPT ew e ku derfetan ava bike, işkenceyê qedexe bike-bisekinîne. Lê mixabin diçin Îmralî, rapora xwe jî dinivîsin lê ti encamên erênî dernakevin. Jixwe karê CPT ew e ku wan sûcan bide sekinandin. Ev jî encama berjewendiyên dewletan e ku pîvanên wan nepêkanîna aştiyê ye. Tecrîda li ser rêber Abdullah Ocalan şermeke mezin a dîrokî ye. Yên ku welatan talan dikin, didizin, çekan difiroşin ti carî naxwazin aştî pêk were, dewlet in. Yên ku berjewendiyên xwe di şer de dibînin divê werin sekinandin û sînor jê re were dayîn. Heta zilm û zordarî hebe em nikarin behsa aştiya cîhanê bikin.”