Rayedarên Komîna Sînemayê ya Avîrn diyar kir ku Mihrîcana Lêlûn a navneteweyî wê li kampên koçberan yên li Şehba li dar bikeve. Herwiha eşkere kir ku heta niha 2 hezar û 200 fîlm ji 150 welatan girtine. Ji wan 58 fîlm li gorî jimara rojên Berxwedana Serdemê ya qonaxa yekê hilbijartine.
Bi tevlîbûna gelek dezgehên çapemeniyê, berpirsên Komîna Sînemayê ya Avrîn civîneke çapemeniyê li Kampa Berxwedan a li kantona Şehba li dar xist. Ji bo ku amadekariyên Mihrîcana Lêlûn a navneteweyî ya ku tê payîn 21`ê Îlonê li dar bikeve, eşkere bikin.
Endamê rêveber ê Komîna Sînema Avrîn Mihyedîn Arselan di civînê de axivî û diyar kir ku ji bo eşkerekirina xebata şeş mehan a lidarxistina Mihrîcana Lêlûn a navneteweyî, civîn li dar xistine.
Arselan got, armanca me ji pêşandana mihrîcanê li kantona Şehba û di nava koçberan de, şkandina bêdengiya navneteweyî ya li hemberî sûcên dewleta Tirk a dagîrker li dijî şêniyên herêmên dagîrkirî û koçberên Efrîn, Serê Kaniyê û Girê Spî ye.
Arselan di berdewama axaftina xwe de diyar kir ku armanca wan ji mihrîcanê di vê dema hesas û dijwar de li gel belavbûna vîrûsa Korona li cîhanê, ragihandina êşa koçberan bi riya kesayetên navdar ên ku di warê sînemayê de kar dikin.
Li gorî Arselan 2 hezar û 150 fîlm ji 150 welatan hatine girtin. jê 58 fîlm li gorî hejmara berxwedana şêniyên Efrînê li hemberî artêşa Tirk a dagirker û çeteyên wê de hatin pejirandin.
Arselan diyar kir ku mihrîcan wê li Kampa Berxwedan di nava koçberên Efrînê de li dar bi keve û wiha got: “Em hêvî dikin ku ev mihrîcan li cîhanê deng vede û balê bikişîne ser bêdengiya navneteweyî li hemberî dagîrkirina herêmên xwe ji hêla artêşa Tirk a dagîrker û çeteyên wê ve.”
Di civînê de deriyê pirsan ji rojnamevanan re hat vekirin. Rêveberên komînê jî bersiva wan dan û diyar kirin ku fîlm wê li Şehba tenê werin pêşandan.
