Rêveberiya Sîvîl ya Demorkatîk ya Reqa ji bo rêgirtina li pêşiya belavbûna Koronavîrûsê biryara qedexeya derketina derve ji bo 14 rojan ragihand.
Di daxuyaniyê de ev xal hatin diyarkirin:
“Ji bo parastina berjewendiya giştî û tenduristiya welatiyên me, li gorî biryara Rêveberiya Xweser ya Bakur û Rojhilatê Sûriyê ya bi jimara 86an ya dîroka 29/07/2020’an, em van biryaran radigihînin:
-Qedexeya derketinê li tevayiya herêmên Meclisa Sîvîl wê 14 rojan dewam bike. Qedexe ji dîroka derxistina biryarê dest pê dike.
-Derveyî rewşên awarte yên weke nexweşiyê ,deriyên ketin û derketina sînorê rêveberiya Meclisa Sîvîl ya Reqa û deriyên ketin û derketina bajêr tên girtin. Li gel vê tedbîrên pêwîst tên standin.
-Nan wê bi riya nûneran were belavkirin.
-Saziyên meclisa Reqa wê li ser karê xwe bimînin û navendên tenduristiyê yên li gundan wê werin xurtkirin.
-Her rengê kombûnê (çayxane, cihê avjeniyê, nimêjin komî, dawet, behiye û hwd..) qedexe ne.”
Desteya Tenduristiyê ya Rêveberiya Xweser ya Bakur û Rojhilatê Sûriyê roja Înê ragihandibû ku li Reqa 3 kes, li Dêrezorê jî 3 kes û li herêma Cizîrî 11 kes bi vîrûsa Koronayê ketine.
