Partiya Yekîtiya Demokrat a Kurdistanê li taxa Xerbî ya bajarê Qamişlo bûroya xwe vekir.
Gelek siyasetmedar û rewşenbîr beşdarî merasima vekirinê bûn. Di merasimê de sekretera partiyê Fesla Yûsif axivî. Fesla di destpêka axaftina xwe de bixêrhatina mêvanan kir û got, “Wê ev navend cihê goftogo, aştî û aramiyê be, cihê kar û xebatê be”
Fesla bal kişand ser daxuyaniya li ser hevdîtinên Kurd-Kurd a 17`ê vê mehê hatî ragihandin û got, “Ew daxuyanî cihê serbilindiyê bû, lê li cem dijminê me cihê dilnexweşiyê bû. Em dibêjin di vê qonaxa nazik de ji me tê xwestin ku em gaveke mezintir li pey vê gavê bavêjin. Da em bikarin projên xwe yê neteweyî kurdî û kurdistana Sûrî bidin pêş û serê xwe ji berjewendiyên miletê xwe re bitewînin.”
Fesla diyar kir ku gava ku avêtine ne li dijî ti pêkahateyên herêmê ye û got, em bi hêvî ne ku bi awayekî wekhev, bikarin devereke aram ji miletê xwe re ava bikin. Da ku em paşroja Sûriyê xweş bikin û azad bikin.”
