‘Serketina pêvajoya yekemê di nava Kurdan de dilxweşî çêkir’

Daxuyaniya hevbeş a Partiyên Yekîtiya Niştîmanî ya Kurdî û ENKS`ê, ku pêvajoya yekê ji lihevkirinê bi ser ket, di nava Kurdan de dilxweşî çêkir.
16`ê Hezîrana 2020`an şandeya Partiyên Yekîtiya Niştimanî ya Kurdî û ENKS`ê pêvajoya yekê ya lihevkirina yekîtiya kurdî bi dawî kir. Di pêvajoya yekê de nêrîneke siyasî ya hevbeş, lihevkirinên destpkê pêk hatin û ev gava yekê û girîng derbarê yekîtiya kurdî de ye.
Her du aliyan bi daxuyaniyeke hevbeş lihevkirinên destpêkê ragihandin. Lihevkirina Dihokê ya 2014`an derbarê hevkariya di rêveberî û parastinê de esas girt da ku lihevkirin û diyalogên heyîn di navbera her du şandeyan de dewam bikin û armanca wê ku lihevkirin di pêşeroja nêz de were îmzekirin.
Şêniyên bajarê Hesekê di vê mijarê de axivîn.
Nalîn Mihemed wiha got: “Em serketina vê pêvajoyê li gelê Kurd û partiyên beşdar pîroz dikin. Serketina pêvajoyê hevgirtina gelê Kurd li dijî dijmin wê xurt bike.”
Nalîn diyar kir ku tirsa dewleta Tirk ji yekîtiya Kurdan heye. Ji ber wê jî her tim hewl dide bi komplo û êrîşan yekîtiya kurdan asteng bike.”
Welatiyê bi navê Ebdulqadir Ferhan jî li ser girîngiya serkeftina merheleya yekê keyfxweşiya xwe diyar kir û got, merheleya siyasî ya ku gelê Kurd û herêm tê re derbas dibe pir hesas e.”