Endama koordînasyona Kongreya Star a kantona Hesekê Nûra Şihab diyar kir ku artêşa Tirk a dagîrker bi êrîşa ser jinê dixwaze pêşketina civakî asteng bike û got,”Lê wê negihe armanca xwe. Lewre rêxistinên jinan yên Bakur û Rojhilatê Sûriyê li hemberî kiryarên wê bêdeng namînin.
Artêşa Tirk a dagîrker ji destpêka dagîrkirina Efrînê ve, kiryarên hovane dike. Ji wê demê ve bi sedan welatiyên herêmê direvîne û li hemberî berdana wan fîdyeyê dixwaze. Jin ji van kiryaran bêpar neman, li dijî wan her renge zorê tê kirin. Ev kiryar heta niha dewam dikin.
Berî çend rojan dîmenekî ji girtîgehên komên çete yên girêdayî artêşa Tirk a dagîrker ên li Efrînê belav bû. Di girtîgehê de hin jinên Efrînî yên hatîn revandin hatin dîtin.
Têkildarî mijarê endama Koordînasyona Kongreya Star a kantona Hesekê Nûra Şihab got, “Ji destpêka şoreşa Sûriyê ve jinên Bakur û Rojhilatê Sûriyê ji bo avakirina civakeke demokratîk têdikoşin.”
Nûra da zanîn ku qadên jin tê de xebitîne pêş xistina û axaftina xwe wiha domand: “Jin roleke pêşeng û girîng di birêvebirina tevayiya qadên leşkerî, siyasî û civakî de dilîze. Bi awayekî balkêş di şoreşa Rojava de pêş ket. Lê artêşa Tirk a dagîrker bi kiryarên xwe yên hovane hewl dide vîn û nasnameya jina azad bişkîne û biçewsîne. Bûyerên li herêmên dagîrkirî dibin, nîşanên vê ne.”
Nûra Şihab di dawiya axaftina xwe de bêdengiya li hemberî van kiryaran şermezar kir û bang li rêxistinên jinan ên li cîhanê û mafên mirovan kir ku ji bêdengiya xwe derkevin.
Dagîrker bi êrîşa ser jinê hewl didin pêşketina civakê tine bike
