Balafireke sîxûrî ya dewleta Tirk a dagîrker gundê Sefrê yê girêdayî bajarokê Mawat yê Silêmaniyê bombebaran kir. Hat gotin balafira bêmirov a Tirk wesaitek kiriye hedef û kesên tê de jiyana xwe ji dest dane.
Li gorî agahiyên ji çavkaniyên herêmî hatîn girtin û qaymeqamê bajaroka Mawat yê Silêmaniyê jî piştrast kiriye, roja Çarşemê saet li derdora 11.30’an balafireke sîxûrî ya Tirk gundê Sefrê yê ser bajarokê Mawat yê girêdayî Silêmaniyê bombebaran kiriye.
Li gorî agahiyên ji herêmê hatîn bidestxistin, balafira bêmirov wesaitek û nexweşxaneya gund kirine hedef û kesên di nava wesaitê de jiyana xwe ji dest dane.
Hinek dezgehên ragihandinê yên Başûrê Kurdistanê jî îddîa kirin ku wesaita bûyî hedef, ya gerîlayan bûye.
Wezareta Parastinê ya Tirk jî diyar kir ku wan êrîş pêk aniye.
Têkildarî encama êrîşê û kesên jiyana xwe ji dest dayîn, ti daxuyaniyên fermî nehatine dayîn.
