Rêxistina Tenduristiyê ya Cîhanê (WHO) ji ber bilindbûna jimara nexweşên Koronavîrûsê li Hindistan û Brezîlya, hişyarî da her du welatan. Brîtanya jî piştî sekinandina bikaranîna dermanê bi navê Hydroxychloroquine, ji bo pêşîgirtina li vîrûsê tedbîrên berfireh girtin.
Belavbûna Koronavîrûsê (Covid-29) li cîhanê didome. Heta niha 5 milyon û 689 hezar kes bi vîrûsê ketine, ji wan 2 milyon û 432 hezar kes baş bûne û 352 hezar kes mirine.
WHO diyar kir ku cîhan niha rastî pêla duduyan ya vîrûsê nehatiye, lêbelê di asta herî jor a pêla yekê de ye. Rayedarê rêxistinê Dr. Mike Ryan got, “Li hin herêmên Emerîkaya Başûr û başûrê Asya, jimara nexweşan pir bilind dibe. Li Hindistanê ser 6 hezar û 500î re kesin din bi vîrûsê ketin.”
Mike Ryan hişyarî da Brezîlya ku bilez li jiyana asayî venegerin. Li Brazîlya bi awayekî berbiçav rojên dawiyê jimara nexweşên vîrûsê de bilind bû. Wezareta Tenduristiyê ya Brezîlya ragihand ku 16 hezar û 324 kesên din bi vîrûsê ketine.
WHO: Koronavîrûs di asta herî jor de ye
