Dewleta Tirk a dagîrker careke din çeka “Avê û agir” li dijî welatiyên Bakur û Rojhilatê Sûriyê bi kar tîne.
Piştî 4 salan cara duduyan e ku dewleta Tirk a dagîrker asta ava çemê Firatê bi rêjeya ji sedî 60 li ser Sûriyê kêm kir.
Ava çemê Firatê ji bo milyonan welatiyên herêma Firatê ya Bakurê Sûriyê û herêmên din ên mîna Reqa û Dêrezorê çavkaniya jiyanê ye. Herwiha ava vexwarinê dide bajarê Helebê.
KÊMBÛNA ASTA AVA ÇEMÊ FIRATÊ ÇANDINÎ Û ÇÊKIRINA KEHREBEYÊ DIXE XETERÊ
Çemê Firatê avê dide deştên bakurê rojhilatê Sûriyê. Li gorî komîte û desteyên çandiniyê yên herêmê firehiya rêjeya ku bi genim, darên meyweyan û baxçeyan hatiye çandin, li derdora 400 hezar hektarî ye.
Hevseroka Meclisa Navçeya Qenaya ya rojavayê kantona Kobanê Sûad Dumer gotf: “Dewleta Tirk bi zanebûn asta ava çem kêm dike. Ev yek gefê li berhema xwecihî ya zebzeyan ên li dirêjahiya qiraxa çem hatine çandin dixwe. Ku berhem dide herêmên din ên Bakur û Rojhilatê Sûriyê.”
Di heman demê de kêmbûna asta avê metirsiyên qutbûna kehrebê zêde dike ku dê rojane zêdeyî 12 saetan kehrebe qut bibe. Tirkiye di sanyeyekî de bi rêjeya 200 mître kabik avê berdide. Ev yek peymana sala 1987 a di navbera Şam û Enqere de hatibû îmzekirin, binpê dike.
JI BER TOPBARANA TIRKIYÊ 80 HEKTAR ZEVIYÊN ÇANDINIYÊ BÛN XWELÎ
Îsal cardin şewitandina zeviyan dûbare dibe. Roja Yekşem û Duşemê ji ber topbarana dewleta Tirk a dagirker derdora 80 hekar zeviyên çandiniyê yên gundên rojavayê kantona Kobanê şewitîn. Leşkerên dagirkeriyê ji bajarê Cerablusê ku dagir kirine bi zanebûn guleyan ber bi qiraxê rojhilat ê çemê Firatê diavêjin.
Roja Yekşem û Duşemê yên borî çeteyên bi navê “Mertala Firatê” yên ku desteka xwe ji Tirkiyê digirin zeviyên genim ên deşta Bûrazê şewitandin.
Sûad Dumer di dawiya axaftina xwe de got: “Kêmbûna avê û hedefgirtina zeviyên çandiniyê çeka Tirkiyê ku li pêşiya çavê cîhana bêdeng bi kar tîne. Kiryarên Tirkiyê li dijî qanûn û belgeyên navnetewî ne. Gelo tiştekî aqilane ye ku di du hefteyan de asta avê 2 km kêm bibe. Ev kiryar dê karesekê ji beşek mezin a xelkê Sûriyê re çêbike. Divê civaka navdewletî sînorekî ji binpêkirinên dewleta Tirk re deyne.”
