Helbestvan û nivîskar Cano Şakir pirtûka ’Antolojiya Helbesta Nûjen a Rojava’ amade kiribû û ev berhem Sibata borî ji weşanên Ar derketibû. Di pirtûkê de helbestên 96 helbestvanên ji Rojavayê Kurdistanê û agahiyên li ser jiyana wan hene.
Ev pirtûka li Stenbolê derketî, berhema dehan a Cano Şakir e. Cano Şakir ji bo vê pirûka xwe dibêje, ”Xebata min salekê kudand. Dixwazim vê bêjim, min di nava salekê de karî xwe bigihînim 107. helbestvanan. Her wiha ji van tenê 96 beşdar bûn. 11 hebestvanên ku tevlî nebûn, 4´an ji wan bersiv da û 7 kesan jî tew bersiv jî neda. Li vir dixwazim bibêjim ku li Rojavayê Kurdistanê bingehek xurt ji bo helbesta Kurdî (Kurmancî) tê danîn.”
Axir Cano Şakir dibêje, wê qiosmekî lêkolînî jî di destpêka antolojiyê de nivîsiye, da ku helbestê bide nasîn û xasma şirovekirin û naskirina helbesta dinyayê hinekî mumkin bike; lewma bi ya wî heta ev nebe, “aliyekî me yê wêjeyî wê seqet û lawaz bimîne.”
Pirtûka antolojiyê weke malekê weke pirekê
Cano Şakir dibêje ew xebata wî bi rengekî ji rengan dibe weke malekê, weke pirekê ji bo wan şairên her yekî li welatekî, da bên cem hev. Ew dibêje, piştî ku kitêb Sibatê ji weşanên Arê derketiye, niha êdî hêdî hêdî tê belavkirin: “Li Rojava hêdî hêdî tê belavkirin, li Stenbolê û Bakurê Kurdistanê jî. Ez bi xwe hewl didim ku kitêb bigihîje Başûrê Kurdistanê, Rojavayê Kurdistanê, bigihîje wan deverên kurd lê ne. Vê bi înîsiyatîfa xwe û hin saziyan vê dikim.”
Kitêba Antolojiya Helbesta Nûjen a Rojava, tevî qismê lêkolîna helbestê ji 718 rûpelan pêk tê, û ji Weşanên Arê li Stenbolê Sibata 2020´an derçûye.
Kitêba Antolojiya Helbesta Nûjen a Rojava
