Kesên ji Şamê vedigerin Qamişlo ku di navendên taybet de ne, rojane test ji wan re tên çêkirin da selametiya wan ji Koronavîrûsê piştrast bibe û vîrûs li herêmê dernekeve.
Tîmên awarte yên girêdayî Şaneya Aloziyê ya Bakur û Rojhilatê Sûriyê rojane testan ji kesên ji Şamê vedigerin re çêdikin ku selametiya wan piştrast bikin. Herwiha tedbîrên pêwîst tên girtin heta ku dema karantînayê bi dawî bibe.
Ji 23`yê Adara derbasbûyî ve qedexeya derketina derve li Bakur û Rojhilatê Sûriyê dewam dike. Rêveberiya Xweser herwia gelek tedbîrên pêwîst girtin. Lêbelê hişmendiya hikumeta Sûriyê û domandina rêwîtiya bi balafiran ya di navbera Şam û Qamişlo de rewş bixetertir kir. Bê agahdarkirina Rêveberiya Xweser, di hefteyekê de bi behaneya ku rêwî leşker in, ji Şamê 3 seferên bi balafirê hatin kirin. Lê diyar bû ku di nava wan de sivîl jî hebûne. Li ser vê rewşê Şaneya Aloziyê destwerdan kir û testên pêwîst çêkirin. Pişt re wek tedbîreke awarte xistin navendeke karantînayê.
Hevserokê Desteya Tenduristiyê ya Bakur û Rojhilatê Sûriyê û endamê Şaneya Aloziyê Ciwan Mistafa têkildarî mijdarê wiha axivî: “Ji bo rêwiyên tên balafirgeha Qamişlo, em pirsgirêkeke cidî dibînin. Tevî qedexeya derketinê jî, rêwîtiya asîmanî tê kirin. Herwiha hin rêwî bi awayekî qaçax tên derbaskirin da rastî testên tenduristiyê û karantînayê neyên.”
Ciwan Mistafa da xuyakirin ku têkildarî kesên tên herêmê û rastî testên tenduristiyê û karantînayê nayên, hevkariya di navbera wan, komîn û meclisan de dewam dike û wiha got: “Bi saya hevkarî û koordîneya di navbera Şaneya Aloziyê, komîn û meclisan de, me hin kes anîn û testên tenduristiyê ji wan re çêkirin û xistin cihên taybet.”
Ciwan Mistafa diyar kir ku ji bo 65 kesên hatîn herêmê, Şaneya Aloziyê bi awayekî awarte navendek tevî pêwîstiyên wê, ji wan re amade kiriye.
Ji bo kesên ji Şamê vedigerin test tên çêkirin
